Ավտոտրանսպորտային միջոցը համայնքային վճարովի ավտոկայանատեղում կայանելու համար տեղական տուրքը կամ, այսպես կոչված, «կարմիր գծերի» համար չվճարելը, գործող իրավակարգավորմամբ, առաջացնում է ֆիքսված տուգանքի նշանակում՝ 5 հազար դրամ:

Սա երկրի նվազագույն աշխատավարձի չափի պայմաններում խայտառակ թիվ է: Չհաշված այն, որ միջին հաշվով քաղաքացին ունենում է ամսական երկու տուգանք ՃՈ-ից, կարելի է եզրակացնել, թե, այսպես կոչված, «կարմիր գծերի» կողմից գանձվող 5000 դրամ գումարն ինչպիսի հարված է հարկերի ու տուրքերի տակ կքած, հատկապես ոչ ստանդարտ իրավիճակներում հայտնված քաղաքացու գրպանին:

Դիցուք՝ դեպքը, որի մասին ուզում եմ պատմել. Քաղաքացին վճարել է տարեկան գումարը 12 հազար դրամ, ժամկետը լրանալուց հետո, գտնվելով անձնական խառը իրավիճակում, չի նկատել sms հաղորդագրությունը  և մոռացել է վճարել: Մեկ ամսվա ընթացքում, որտեղ կանգնել է մեքենան, տուգանք է ֆիքսվել, ու մոտ 20 անգամ 5000 դրամ պարտք գոյացել:

Կա՞ այս հարցի լուծման տարբերակ։ Վստահ եմ, որ չկա, այսինքն՝ չնախատեսված իրավիճակների համար որևէ լուծում չի առաջարկվում։ Քաղաքացին պետք է վճարի 100 հազար դրամ՝ մոտավորապես նվազագույն աշխատավարձի կրկնակին:

Իսկ ինչ սկզբունքներից ելնելով է սահմանվել գումարի այս չափը, ինչ ծառայություն են իրականացնում «կարմիր գծերը», ինչի վրա են ծախսվում հավաքագրված գումարները, երբ քաղաքապետարանի կատարած աշխատանքը և դրա արդյունքը բոլորիս աչքի առջև են։

Ի վերջո, 100 դրամի դիմաց կարելի է տուգանել 500 դրամ, բայց ոչ՝ 5000։ Սա, մեղմ ասած, մարդկանց վրա թքած ունենալու ու թալանի ծրագիր է, որ ոչնչով արդարացված չէ:

Ռուզան Ավոյան