«Հայկական Վարկածի» խմբագրություն դիմած քաղաքացին պատմում էր, թե ինչ շիլա է դարձել նախընտրական շրջանը: Բոլորին էլ գիտեն, որ կան, այսպես կոչված, ցուցակներ հավաքող մարդիկ, որոնք անուն, ազգանուն, անձնագրի տվյալներ են հավաքագրում՝ կոնկրետ շտաբի պետերին հավաստիացնելով, որ նշված մարդիկ կոնկրետ թեկնածուի օգտին են քվեարկելու ու դրա դիմաց ստանում են վարձատրություն:

Մի քանի տարածքում իրավիճակը սրվել է. բավականին կոշտ է պայքարը Սամվել Ալեքսանյան և Արայիկ Հովհաննիսյան զույգի պարագայում, որոնք երկուսն էլ Հանրապետական կուսակցությունից են առաջադրված:

Քաղաքացին պատմեց. որ իրենց այցելել են երկու շաբաթ առաջ, որոշակի խոստումներ տվել և փորձել հավաստիանալ ,որ ընտրելու է Ալեքսանյանին: Ցուցակագրել են իր անունը, անձնագրի սերիան, հեռախոսահամարը՝ հատուկ նշելով, որ ընտրելու դեպքում իր համար լավ է լինելու:

Անցյալ շաբաթ բուկլետներ բաժանելու պատրվակով կրկին են այցելել և կրկին նույն հարցը՝ ում եք ընտրելու։Քաղաքացին հաստատել է, որ ընտրելու է իրենց թեկնածուին:

Այսօր ցուցակագրողները խուճապի մեջ են։ Զանգահարել են, թե՝ թեկնածուն մտավախություն ունի, որ, ճիշտ է, դուք տրամադրել եք ձեր տվյալները, բայց, այնուամենայնիվ, ընտրության օրը չեք քվեարկի իր օգտին: Ստուգելու համար մեր աջակիցներից էլի կզանգեն ձեզ, էնպես չանեք, որ կասկածեն, թե դուք խաբելու եք և այլ անձի օգտին եք քվեարկելու» :

« Մտավախություն ունեմ, որ նրանք  հաստատ ձայնագրում էին մեր խոսակցությունը: Իմ կարծիքով՝ ցուցակ տանողներն այլևս հավատ չեն ներշնչում, և նրանց հրահանգվել է վստահելի լինելու համար ձայնագրություն բերել: Չի բացառվում նաև մեկ այլ վարկած , քանի որ ցուցակագրողները շատացել են, թեկնածուները  նրանց ստուգում են այլ մեթոդներով, ու ամեն քայլի գնում են, որպեսզի չտան խոստացված գումարները: Ասել են  իբր՝ անձամբ Սամվել Ալեքսանյանն է հրահանգել՝ ավելի հստակեցնել ընտրողներին..  Ալեքսանյանն ասել ա՝ ուր ա, ասում եք ընտրողները կան, բայց ում զանգում են, ասում են՝ դեռ չենք կողմնորոշվել» ,վրդովված ասաց  քաղաքացին։

Մի խոսքով՝ սատանան  գլուխ չի հանում՝ սա ընտրություններ է, թե՝ ինչ։