Կառավարությունն այսօր ԱԺ-ի քննարկմանն է ներկայացրել «Բնապահպանական իրավախախտումների հետեւանքով կենդանական եւ բուսական աշխարհին պատճառված վնասի հատուցման սակագների մասին» ՀՀ օրենքում փոփոխություններ կատարելու նախագիծը:

Բնապահպանության փոխնախարար Սիմոն Պապյանն ասաց, որ 2010-ին կառավարության կողմից հաստատվեց Կարմիր գիրքը՝ բույսերի եւ կենդանական տեսակների: Այնտեղ բավականին փոփոխություններ տեղի ունեցան եւ հիմա բնականաբար, պետք է փոխվեն այդ բույսերի եւ կենդանիների ոչնչացման համար սակագները: Ըստ նախագծի, սահմանվել է, օրինակ, որ Կարմիր գրքում գրանցված բույսերից 1 կգ ապօրինի հավաքելու համար քաղաքացիները պետք է վճարեն 10- 20 հազար դրամ: Գործող օրենքով, եթե խոշոր եղջերավոր անասունները արածելիս կամ ապօրինի խոտհունձի ժամանակ վնասում էին անտառային կուլտուրաներ, մատղաշ ծառեր, պետք է վճարեն 100 եւ 150 դրամ:

Կառավարությունն առաջարկել է տուգանքը դարձնել 1000 եւ 1500 դրամ, բայց Տաճատ Վարդապետյանը ժողովրդի սոցիալական ծանր վիճակը հաշվի առնելով՝ առաջարկել է կիրառել գործող օրենքով նախատեսված սակագնի կրկնակին՝ 200 եւ 300 դրամ, ինչն ընդունվել է: Ուշագրավ է, որ նախագծով կառավարությունը նախատեսում է 15 հազար դրամով տուգանել այն քաղաքացիներին, որոնք ապօրինի կվնասեն, կորսան անդրկովկասյան մողեսիկ: Թիթեռների, ճպուռների, բզեզների համար 3000 դրամ տուգանք է սահմանվում:

Պակաս չեն գնահատվել նաեւ մրջյունները, նրանց ապօրինի ոչնչացնելու համար դարձյալ տուգանքը 3000 դրամ է: Հայկական մկնիկ վնասելը շատ թանկ կնստի քաղաքացիների վրա՝ 25 հազար դրամ: Սեւանի Կողակի եւ Բեղլուի ապօրինի որսը 10 եւ 25 հազար դրամի տուգանք է առաջացնելու: Այսպես` մեկ առ մեկ սահմանվել են չղջիկներ, ոզնիներ, խխունջներ եւ մյուս արժեքավոր կենդանիներ ու բույսեր ոչնչացնելու տուգանքները:

ՀՀԿ խմբակցության պատգամավոր Խոսրով Հարությունյանն ասաց. «Օրինակ, սողունների համար 2000 դրամ տուգանք ենք սահմանել, բայց դա շատ դժվար է վերահսկել: Բացի այդ, եթե այդքան կարեւոր նշանակություն ունի դա մեր կենդանական աշխարհի համար՝ ինչո՞ւ այդքան էժան՝ ընդամենը 2 հազար դրամ»: Փոխնախարարը համաձայնեց, որ իսկապես, դա լուրջ խնդիր է: Նա ասաց, որ հիմա նախագծեր են պատրաստում, որ կարողանան ավելի իրական վերահսկողության մեխանիզմներ դնել. «Խոշոր կենդանիների մասով անցյալ տարի մոտ 60 մլն դրամի տուգանք ենք կիրառել՝ Բեզոարյան այծի մասով, արջերի մասով, սողունների մասով դեռ չունենք»:

Սիմոն Պապյանն ասաց, որ կփորձեն ժամանակակից մեխանիզմներ դնել, որ կարողանան վերահսկել գոնե հատուկ պահպանվող տարածքներում: Սա կանխարգելիչ միջոց է: Ըստ փոխնախարարի, պետք է հանրության մտածելակերպը փոխվի. «Եթե չփոխվի, մենք չենք կարող ամեն մի քաղաքացու գլխին մի տեսուչ կանգնացնել»:
aravot.am