Այսօր լրագրողների հետ հանդիպման ժամանակ «Զորավիգ» թերթի գլխավոր խմբագիր, իրավապաշտպան Պուշկին Սերոբյանը, խոսելով բանակում տեղի ունեցող անհասկանալի միջադեպերի մասին, դժգոհություն  հայտնեց ՀՔԱ Վանաձորի գրասենյակի ղեկավար Արթուր Սաքունցի այն հայտարարության կապակցությամբ, որով վերջինս պահանջում է զրոյի հասցնել բանակում տեղի ունեցող միջադեպերը:

«Զրոյի հասցնելը հնարավոր չէ, անգամ եթե Սաքունցը դառնա նախարար»,- ասաց նա՝ ավելացնելով, որ նույնիսկ ամերիկյան բանակում, որտեղ  կարգ ու կանոնը բարձր մակարդակի վրա է , նման դեպքեր  ևս հանդիպում են:

Ըստ խմբագրի՝ բացառված է բանակային միջադեպերն անգամ զրոյին մոտեցնելը, քանի որ կան մի շարք հասարակական ու քաղաքական  հանգամանքներ, որոնց գոյությունը բացառում է այդ հնարավորությունը. «Մենք պահանջում ենք նախագահի հրաժարականը, բայց նա հիվանդանոցի պահակը չէ, որին հիվանդանոցի բժիշկն է նշանակում»: Ըստ նրա՝ անկախության առաջին տարիների համեմատությամբ հիմա բանակային միջադեպերը կտրուկ նվազել են, հետևաբար, Սերոբյանի խոսքով, այս պայմաններում բողոքելը նշանակում է, որ խնդիրը քաղաքականացվում է՝ նպատակ ունենալով խախտել երկրի անդորրը:

«Սերժ Սարգսյանը լավագույն դեպքում պետք է պատասխան տա վերջին երեք տարիների ընթացքում բանակում տեղի ունեցած մահվան դեպքերի համար»,- հայտարարեց Սերոբյանը՝ հավելելով, որ ինքը նախագահի ներկայացուցիչը չէ, սակայն կարծում է, որ պետք է քննադատությունը լինի տեղին ու արդար, հստակ և հասցեական: «Երբ մենք նախագահի կամ նախարարի հրաժարականն ենք պահանջում, կամ ասում, որ նախարարը պետք է ինքնասպան լինի, դա չի տեղավորվում մեր իրավագիտակցության մեջ»,- հայտարարեց իրավապաշտպանը:Եվ վերջում առաջարկեց ձևավորել հանձնաժողով` բանակային միջադեպերը ուսումնասիրելու համար: