«Այդ դեպքը ինձ պատահեց ամսի 31-ին, երբ ինձ ձերբակալեցին եւ հետ ուղարկեցին Հայաստան: Ես բավարարվեցի միայն հայտարարություն անելով եւ սպասելով ՌԴ պարզաբանմանը: Գիտեք, որ նախադեպեր եղել են, երբ օտարերկրացիներին արգելում են մուտք գործել այս կամ այն երկիր, բայց հետո, պարզվում է` տեղի է ունեցել թյուրիմացություն»: Այս մասին այսօր հրավիրված մամուլի ասուլիսի ժամանակ նշեց Գլոբալիզացիայի և տարածաշրջանային հետազոտությունների կենտրոնի ղեկավար Ստեփան Գրիգորյանը` անդրադառնալով  իր մուտքը Ռուսաստանի Դաշնություն արգելելու անօրինականությանը:

«Ես բաց եմ աշխատել, եւ կրիմինալ ոչինչ չկա, մեր բոլոր համագործակցությունները միջազգային կառույցների հետ թափանցիկ են: Ինձ տվել են տեղեկանք, որտեղ գրված է, որ ՌԴ մուտք ու ելքի մասին օրենքի համաձայն` մարդկանց կարող են զրկել մուտքի իրավունքից»,- ասաց Գրիգորյանը, հավելելով, որ ուսումնասիրել է օրենքը,  եւ դրանում առկա սահմանափակումներն իրեն չեն վերաբերել: Գրիգորյանի խոսքով՝ դրանք վերաբերել են խախտումներին, որոնք քաղաքացին կատարել է Ռուսաստանում, իսկ ինքն այնտեղ չի եղել: «Ես միայն ինձ վերաբերող մեկ կետ գտա` դա 9-րդ կետն է: Այն օտարերկրացիները, ովքեր աշխատում կամ համագործակցում են տարբեր պետությունների, տարբեր միջազգային կազմակերպությունների հետ, կարող են մուտք չունենալ Ռուսաստան, եթե այդ կազմակերպությունների տեսակետները դեմ են Ռուսաստանի տեսակետներին»,- նշեց Ստեփան Գրիգորյանը:  Նա ասաց, որ եթե արգելքը լիներ, օրինակ` 10 տարի, ապա ինքը կհասկանար, բայց որ մինչեւ 2030 թվականը, ապա դա ակնհայտ ճնշում է: «Այդ աննախադեպ սանկցիայի կիրառումը քաղաքական բնույթ է կրում»,- նշեց Գրիգորյանը:

Նա նշեց, որ խորհրդակցել է մարդու իրավունքների պաշտպանությամբ զբաղվող կառույցների հետ, խորհրդակցել է նաեւ ՀՀ օմբուդսմենի հետ եւ կպաշտպանի իր իրավունքները:

Անդրադառնալով Հայաստանի ԱԳՆ-ի արձագանքին` Ս. Գրիգորյանը նշեց, որ նախարարությունն արագ արձագանքել է: «Ռուսաստանի կողմից արձագանք չեմ լսել, միայն կարդացել եմ մամուլում, որ Հայաստանում ՌԴ դեսպանատան աշխատակիցներն են որոշ բաներ խոսել»,- նշեց քաղաքագետը:  Միեւնույն ժամանակ Գրիգորյանն ասաց, որ շարունակելու է իր գործունեությունն այնպես, ինչպես արել է մինչ այժմ, եւ կքննադատի Ռուսաստանին, եթե նրա գործողություններում Հայաստանի առնչությամբ սխալներ տեսնի:

Նա նաեւ դիմեց Հայաստանի իշխանություններին: «Եթե Ռուսաստանի Դաշնությունը պատասխան չտա իմ դեպքի հետ կապված, ապա մեկ ռուս հայտնի փորձագետի թույլ չտալ մուտք գործել Հայաստան»,- ասաց քաղաքագետը: Նա նաեւ առաջարկեց իշխանություններին դիվանագիտական խողովակներով ճշտել, թե կա՞ն  արդյոք Ռուսաստանում «սեւ ցուցակներ»:

Հիշեցնենք, որ Ստեփան Գրիգորյանը իր տարածած հայտարարության մեջ, մասնավորապես, նշել էր, որ օգոստոսի 30-ին` առավոտյան 08․00-ին, ժամանել էր Մոսկվայի «Շերեմետևո» օդանավակայան` 2014 թ․ Ռուսաստանի Դաշնությունում հողին հանձնված հոր՝ Գևորգ Գրիգորյանի շիրմին այցելելու նպատակով, որի համար ինքն ունեցել է ընդամենը 10 ժամ, քանի որ նույն օրը գիշերը պետք է վերադառնար Երևան։