Այսօր Ադրբեջանի ԱԳՆ պաշտոնական ներկայացուցիչ Հիփմեթ Գաջիևը լրագրողներին տեղեկացրել է, որ իրենց ջանքերի շնորհիվ Երևանում չեղյալ է հայտարարվել Արցախի անկախության 25-ամյակին նվիրված միջազգային մի գիտաժողով: Ըստ նույն Գաջիևի` գիտաժողովը կազմակերպիչներից մեկը Քաղաքականության և միջազգային հարցերի ֆրանսիական մի կենտրոն է, որի ղեկավարը Ֆաբիան Բաուսարտն է: Բացի այդ, պարզվում է, որ սեպտեմբերի 2-3-ը Երևանում կայանալիք գիտաժողովի մասնակիցները, ովքեր նախկին պաշտոնյաներ, հասարակական ու քաղաքական գործիչներ պետք է լինեին, գիտաժողովից հետո պետք է այցելեին նաև Լեռնային Ղարաբաղ: Բայց անսալով ադրբեջանական ԱԳՆ-ի բացատրություններին և հորդորներին առ այն, որ պետք է հարգել միջազգային օրենքները և զերծ մնալ «բռնագրաված տարածքներ ապօրինի մուտքից», գիտաժողովի մասնակիցները, այդ թվում` Ֆաբիան Բաուսարտը հրաժարվել են իրենց մասնակցությունից:

Ու Գաջիևը մեծ ցնծությամբ պարծեցել է, որ ահա, իրենք հզոր են, կարողացել են «հայկական հերթական սադրանքը չեզոքացնել»:

Բայց պարզվում է, որ նման գիտաժողովի գոյության մասին ոչ Հայաստանում, ոչ էլ Ղարաբաղում տեղյակ չեն: ՀՀ ԱԳՆ մամուլի խոսնակ Տիգրան Բալայանը մեզ տեղեկացրեց, որ նման գիտաժողով Հայաստանի Հանրապետությունը, ի դեմս ԱԳՆ-ի չի կազմակերպում: ԼՂՀ ԱԳՆ-ից էլ մեզ ասացին, որ Արցախի անկախության 25-ամյակի միջոցառումները համակարգող պետական հանձնաժողովը նման միջոցառում չի նախատեսել: Ու ընդհանրապես նման գիտաժողովի մասին չեն էլ լսել:

Իսկ համացանցում երկար փնտրելուց հետո գտանք «Քաղաքականության և միջազգային հարցերի կենտրոն» ճոռոմ անվանումով ՀԿ-ն: Պարզվեց, որ նրա ղեկավարը Բաուսարտը աչքի է ընկել միայն նրանով, որ անցած տարվա հոկտեմբերին Չեչնիայի նախագահ Կադիրովին պարգևատրել է «Ահաբեկչության դեմ պայքարի և արիության համար» պատվոգրով:

Որ ադրբեջանական կողմը սեփական ուժն ու խոսքի կարևորությունը ցուցադրելու համար չի վարանում դիմել ստի, հայտնի բան է: Բայց դե ախր, սուտն էլ պետք է մի քիչ ճշմարտանման լինի:

Աղբյուրը nyut.am