.lragir.am-ը գրում է.

Թուրքիայի էկոնոմիկայի նախարարի հայտարարությունը, թե Անկարան ուզում է դառնալ ԵՏՄ անդամ, հասկանալիորեն մեծ ուշադրության է արժանացել Հայաստանում: Եթե Թուրքիան դառնա ԵՏՄ անդամ, ապա դա իհարկե լիովին կամբողջացնի այն «ընկերախումբը», որում հայտնված կլինի Հայաստանը: Թեեւ, իհարկե կմնա դեռ Ադրբեջանը: Բայց, Ադրբեջանի բացակայությունը հարաբերական է, ինչպես հարաբերական է ԵՏՄ հասկացությունն ընդհանրապես:Եվ հենց այդ մասով է Թուրքիայի նախարարի հայտարարությունն ամենաուշագրավը: Նա թվարկել է պետություններին, որ Ռուսաստանը ներառել է ԵՏՄ մեջ, եւ այդ թվում բացի ԵՏՄ անդամներից, թուրք նախարարը թվարկել է նաեւ Ադրբեջանին: Իսկ Ադրբեջանն, ինչպես հայտնի է, ԵՏՄ անդամ չէ ( Lragir.am):

Չգիտե՞ այդ մասին թուրք նախարարը: Հազիվ թե չիմանա: Պարզապես նրա, եւ թերեւս Թուրքիայի իշխանության ընկալման մեջ ԵՏՄ հասկացությունը ավելի շուտ ոչ ֆորմալ է: Եվ այդ ոչ ֆորմալ ԵՏՄ շրջանակը ներառում է նաեւ Ադրբեջանը:

Եվ նրա իրավացիության վկայությունները բազմաթիվ են, ընդhուպ ապրիլյան պատերազմ: Անցնող երեք տարին՝ սեպտեմբերի 3-ից հետո, լի է բազմաթիվ օրինակներով, երբ ցցուն դրսեւորվել է, որ ԵՏՄ անդամները Հայաստանին վերաբերող կարեւոր հարցերում առավել նշանակություն են տալիս Ադրբեջանի կարծիքին, ձգտում են չնեղացնել Ալիեւին, իսկ պատերազմի օրերին պարզապես քաջալերում են նրան:

Ի վերջո, այդ հանգամանքը խոստովանել է նաեւ Սերժ Սարգսյանը՝ ՀԱՊԿ 2014 թվականի դեկտեմբերի հավաքին, մեղադրելով այդ կազմակերպության անդամներին, որոնք նաեւ ԵՏՄ անդամներն են, թե անգամ հեռախոսափողը չեն վերցնում Հայաստան զանգահարելու եւ իրավիճակով հետաքրքրվելու համար:

Այնպես որ, իրական ԵՏՄ-ն բոլորովին այն չէ, որ կա դե յուրե, որտեղ դե յուրե նախագահողը այժմ Հայաստանն է, իսկ կառույցի գործադիր մարմնի ղեկավարն էլ Հայաստանի ներկայացուցիչը: Դա ԵՏՄ ֆիկցիան է, ցուցանակը: Իրական ԵՏՄ-ն վաղուց է ներառել թե Ադրբեջանը եւ թե Թուրքիան:

Դե յուրե ԵՏՄ անդամ Թուրքիան չի դառնա, եւ էկոնոմիկայի նախարարը իրականում հայտարարում էր հենց այդ մասին: Այլապես նա չէր ասի, թե կասկածի տակ չեն դնում Եվրամիության անդամ դառնալու գործընթացը եւ ԵՄ հետ մաքսային միությունը: Բանն այն է, որ դա նշանակելու է նաեւ կասկածի տակ դնել ՆԱՏՕ անդամությունը: Անկարան գոնե առայժմ պատրաստ չէ դրան, եթե իհարկե երբեւէ կլինի այդպիսի որոշում նախաձեռնելու պատրաստ:

Միաժամանակ, Ռուսաստանն էլ պատրաստ չէ Թուրքիային ընդունել ԵՏՄ, որովհետեւ այդ դեպքում Անկարան կարճ ժամանակ անց դառնալու է արդեն ԵՏՄ ֆորմալ առաջնորդ, եւ այդ կառույցում արդեն կձեւավորվի թյուրքական մի այնպիսի դաշինք, որը կուլ կտա Ռուսաստանին:

Թուրքիայի էկոնոմիկայի նախարարի հայտարարությունն ընդամենը դիրքային բավական բարդ եւ համառ պայքարի վկայություններից մեկն է, որ վարվում է թե աշխարհքաղաքական համատեքստում, թե Ռուսաստան-Թուրքիա հաշտության գործընթացում:

Կարդալ ավելին…