Ամեն տարի Հայաստանում, կարծես, չափորոշիչ է դարձել ԲՈւՀ-երի ուսման վարձերի բարձրացման հանգամանքն ու ցանկությունը: Անկախ երկրում տիրող սոցիալական իրավիճակից և այն փաստից, որ տարեց տարի դիմորդների թիվը նաև վարձավճարի պատճառով է պակասում, այնուամենայնիվ, որոշ ԲՈւՀ-երի դա չի հետաքրքրում:

NewsBook-ը փորձեց պարզել, թե այս տարի Հայաստանի տարբեր բուհերում որքանո՞վ են բարձրացել ուսման վարձերը:

Օրինակ՝ Հայկական պետական մանկավարժական համալսարանում այս տարի բարձրացում չի եղել: «Ոչ այս տարի, ոչ անցած, և ոչ էլ նախանցած տարի որևէ բարձրացում չի եղել, վարձերը նույնն են մնացել: Առհասարակ արդեն վերջին հինգ տարիների ընթացքում մենք ո՛չ բակալավրիատում, ո՛չ մագիստրատուրայում, ո՛չ առկա, և ո՛չ էլ հեռակայում վարձերը չենք բարձրացրել»,- NewsBook-ի հետ զրույցում ասաց Հայկական պետական մանկավարժական համալսարանի ընդունող հանձնաժողովի պատասխանատու քարտուղար Արտաշես Մարտիրոսյանը:

Վերջինս նախ ընդգծեց, որ յուրաքանչյուր բուհ նաև առանձին տնտեսական միավոր է: «Եվ եթե ճիշտ տնտեսական քաղաքականություն է վարում, ուրեմն դրա արդյունքում վարձերը չեն բարձրացնում: Եթե ճիշտ տնտեսական մենջմենթ է վարում, եթե ավելորդ ծախսեր չեն արվում, ուրեմն՝ վարձերի վրա դա չի ազդում»,- ասաց նա:

Տնտեսագիտական համալսարանում ևս նույն իրավիճակն է: «Որևէ ուսման վարձ մեզ մոտ չի բարձրացել այս տարի: Դա վերաբերում է թե՛ առկա, թե՛ հեռակա բաժիններին, և թե՛ մագիստրատուրային»,- մեզ հետ զրույցում ասաց Տնտեսագիտական համալսարանի լրատվության և հասարակայնության հետ կապերի բաժնի պետ Գոհար Գևորգյանը:

Համեմատելով ՀՀ ԲՈւՀ-երի առկա ուսուցմամբ բակալավրիատի ու անընդհատ և ինտեգրված կրթական ծրագրերով 2016/2017 ուսմնական տարվա վարձաչափերը 2015/2016 թվականների վարձաչափերի հետ պարզ դարձավ նաև, որ օրինակ՝ Երևանի Վ.Բրյուսովի անվան պետական լեզվաբանական համալսարանը և Երևանի գեղարվեստի պետական ակադեմիան նույնպես, նախորդի համեմատ, անփոփոխ են թողել ուսման վարձերի չափերը:

Օրինակ՝ Երևանի Վ.Բրյուսովի անվան պետական լեզվաբանական համալսարանում բոլոր բաժիններն անխտիր այս տարի ևս 400 հազար դրամ են կազմում:

Նույնը չենք կարող ասել Մ. Հերացու անվան բժկական համալսարանի մասին: Ոսւման վարձերն այստեղ, նախորդ տարվա համեմատ, ավելացել են:

Օրինակ՝ Բուժական գործ բաժինը, նախորդ տարվա համեմատ, ավելացել է 200 հազարով, երբ նախորդ տարի տվյալ բաժնի վարձը կազմում էր 800 հազար դրամ: Ստամատոլոգիա բաժնի ուսման վարձը ևս ավելացել է 200 հազար դրամով՝ կազմելով 1 միլիոն դրամ:

Ի դեպ, վարձավճարների էական թանկացումներով հատկապես աչքի է ընկնում ԵՊՀ-ն: Այն առարկաները, որոնց ուսման վարձը նախորդ տարի կազմում էին 400 հազար դրամ, այս տարի ավելացել են 30 հազարով՝ կազմելով 430 հազար դրամ:

Արաբագիտություն, իրանագիտություն, թուրքագիտություն, միջազգային հարաբերություններ բաժինները ԵՊՀ-ն-ն որոշել է միանգամից 50 հազարով ավելացնել՝ 550-ից բարձրացնելով 600-ի: Իսկ իրավագիտության ուսման վարձի բարձրացման շեմն ավելի էական է՝ շուրջ 70 հազար դրամ: Այս տարի այն կազմում է 870 հազար դրամ: Ճարտարապետության և շինարարության ազգային համալսարանում ևս որոշակի բարձրացում է եղել:

Օրինակ՝ դիզայնի բաժինը նախորդ տարվա 480-ի փոխարեն այս տարի կազմում է 500 հազար դրամ: Բայց ի տարբերություն ԵՊՀ-ի՝ այստեղ մասնագիտությունների մեծ մասի վարձավճարը որևէ փոփոխության չի ենթարկվել: Խնդրո առարկայի վերաբերյալ առաջիկայում NewsBook-ը կզրուցի ԿԳՆ Բարձրագույն և հետբուհական մասնագիտական կրթության վարչության պետ Ռոբերտ Սուքիասյանի հետ:

Նյութի աղբյուրը ` Newsbook.am