Ինչպես արդեն հայտնել էինք, խորհրդարանի արտահերթ նիստի ժամանակ վիճաբանություն էր տեղի ունեցել պատգամավորներ Հեղինե Բիշարյանի և Նիկոլ Փաշինյանի միջև: Վեճն այնքան էր թեժացել, որ նրանք սկսել էին անձնական վիրավորանքներ հասցնել մեկը մյուսին:

Փաստորեն, երկու ընդդիմադիր պատգամավորներին չի բավականացրել ԱԺ դահլիճում տեղի ունեցած լեզվակռիվը, և նրանք իրենց հաշիվները սկսել են մաքրել «սեփական» ԶԼՄ-ների միջոցով:

Մասնավորապես, այսօր Նիկոլ Փաշինյանին պատկանող «Հայկական Ժամանակ» օրաթերթը գրել էր, որ Հ3 հեռուստընկերությունը, որը «Հայկական վերածնունդ» կուսակցությանն է պատկանում, արդեն 3 ամիս է չի վճարում աշխատակիցների աշխատավարձերը:

Թե ինչու թերթի խմբագրակազմը որոշեց հենց այս պահին անդրադառնալ թեմային, պարզ է. այն ամբողջությամբ տեղավորվում է Բիշարյան-Փաշինյան «պատերազմի» տրամաբանության մեջ: Փաշինյանական ոճը պահպանվում է:

Ստացվում է՝ երկու պատգամավորների մեջ մաղձն այնքան շատ է, որ նրանք չեն բավարարվում դեմ դիմաց իրար վիրավորելով, և կարիք կա «ծանր հրետանու»՝ ամենակարող մեդիայի օգտագործման:

Եվ այժմ, որքան էլ Հ3-ի տնօրինությունը փորձում է հերքումների միջոցով խուսափել սկանդալից, բայց ձնագունդն արդեն գլորվել է: Հարցի առնչությամբ, այլնուամենայնիվ, զրուցեցինք Հ3 հեռուստաընկերության տնօրեն Արամ Հովհաննիսյանի հետ, ով գրեթե նույնությամբ կրկնեց այն խոսքերը, ինչ գրված էր նախապես տարածված հերքման տեքստում և վստահեցրեց, որ իրենց մոտ խնդիրներ չկան.

 «Աշխատավարձերը վճարվում են պարբերաբար, ինչո՞ւ եք անհանգստանում, ինչո՞վ կարող եք օգտակար լինել մեր աշխատակիցներին կամ մեզ: Աշխատավարձերը մեզ մոտ միշտ եղել են կանոնակարգված, իսկ եթե ուշացումներ եղել են, ապա այն բանի հետևանքով, որ այն մարդիկ, ովքեր պետք է տրամադրեին գումարները, ուշացրել են:  Երկրի վիճակը գիտեք ինչպիսին է, և, ցավոք սրտի, իրենք էլ՝ մեր գործընկերները, չեն կարողանում ժամանակին կատարել այդ փոխանցումները: Բայց մեզ մոտ մեկը չկա, որ չվարձատրվի: Մեզ մոտ երբեք խնդիր չի եղել: Խնդիրը այլ վայրում, այլ մարդկանց մեջ է»:

Թե ինչո՞ւ հենց հիմա աղմուկ բարձրացավ իրենց աշխատակիցների վարձատրության խնդրի շուրջ, Արամ Հովհաննիսյանը կրկին մեջբերեց հերքման տեքստը. «Սա Նիկոլ Փաշինյանի կողմից նախաձեռնված հերթական ճղճիմ քայլն էր: Ուրախ ենք, որ իրեն միակ ընդդիմադիր հռչակած անձի, ընդդիմադիր հռչակված օրաթերթը մեր իրականության մեջ ֆինանսական խնդիրներ չունի, ինչը նույնպես մտորելու առիթ է տալիս, սակայն դատապարտում ենք սեփական քաղաքական խառնակչություններում լրատվամիջոցներին ներքաշելու արատավոր պրակտիկան, առավել ևս, որ դա արվում է լրատվամիջոցի կողմից»:

Կմտնի՞ արդյոք Հեղինե Բիշարյանը կամ Հ3 հեռուստաընկերությունը փաշինյանական կեղտոտ խաղերի մեջ, ցույց կտա ժամանակը: Բայց հաշվի առնելով, որ Բիշարյանը «շուտ հանձնվողներից» չէ, կարելի է ենթադրել, որ նա ևս լրատվական դաշտ կօգտագործի՝ Փաշինյանի դեմ «կոմպրոմատները» ի ցույց դնելու համար:

haymedia.am