Այս օրերին, երբ Արցախում իրավիճակը լարված էր, բազմաթիվ բողոքներ էին հնչում, որ Հայաստանում գործող բջջային օպերատորները պետք է հանեն ռոումինգի ծառայությունը Հայաստանի և Արցախի միջև:

Լրագրողների հետ զրույցում  «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը՝ պատասխանելով հարցին, թե հնարավո՞ր է վերանայել Հայաստանի ու Արցախի միջև գործող ռոումինգ ծառայության սակագինը, ասաց, որ երբ պետք է մտնեն հեռահաղորդակցության հարաբերությունների մեջ այլ տարածքի  օպերատորների հետ, պարտավոր են ենթարկվել Միջազգային բջջային կազմակերպության օրենքներին և նորմատիվներին։

Ըստ նրա, եթե Արցախում գործեն նույն սակագները, ինչ Հայաստանի շուկայում, կարող է հարց բարձրանալ՝ Հայաստանն ու Արցախը նո՞ւյնն են:

«Այստեղ ես կարող եմ հակահարց տալ, որ Հայաստան ու Արցախը մեկն են, ինչո՞ւ ունեն երկու նախագահ, երկու կառավարության, երկու խորհրդարան, երկու բանակ: Հարցը շատ դժվար է: Կրկնում եմ՝ մենք գործում ենք Միջազգային բջջային կազմակերպության նորմերի, օրենքների, ստանդարտների ներքո»,- ասաց Ռ.Յիրիկյանը:

Ինչ վերաբերում է ռոումինգի սակագնի իջեցմանը, ապա Յիրիկյանը նշեց, որ այն կարգավորվում է պայմանագրային հիմունքներով, և եթե այսօր` որպես օպերատոր, ցանկությունը հայտնեն նվազեցնել միջազգային ռոումինգի սակագինը, դա կվնասի Արցախում գործող օպերատորներին: «Մենք չենք կարող իջեցնել մեր սակագինն ավելի ցածր, քան տեղում գործող օպերատորի սակագինն է: Մեր ռոումինգային ելքի սակագինը 25 դրամ է, եթե հավաքեք *101*համարը#, կխոսեք 25 դրամով, և դա հաշվարկվում է վայրկյանով, այլ ոչ թե կլորացվում է րոպեով: Դա արդեն նվազագույն սակագինն է, բայց, չնայած դրան, մենք ուզում ենք մի փոքր էլ նվազեցնել սակագինը»,- ասաց նա:

Ըստ Յիրիկյանի՝ սակագինը մի փոքր էլ նվազեցնելու համար հիմա գնում են բանակցություններ, որ փորձեն ինչ-որ ելք գտնել: Նա նշեց, որ անձամբ հանդիպել է զինվորների հետ, և նրանք էլ բարձրացրել են այս խնդիրը: Յիրիկյանը զինվորներին խոստացել է մի քանի ամսվա ընթացքում, բանակցությունների արդյունքում, ինչ-որ ելք գտնել:

Միաժամանակ «ՎիվաՍել-ՄՏՍ» ընկերության գլխավոր տնօրենը նշեց, որ իրենք ամենախոշոր հարկատուն են Հայաստանում, իրենց վճարած հարկից  ծախսվում է զինվորի վրա:

«Որևէ մեկը չի կարող ասել, որ «ՎիվաՍել-ՄՏՍ» ընկերությունն անտարբեր է զինվորի հանդեպ: Մենք իրականացնում ենք շատ ծրագրեր, որոնց մասին չենք ցանկանում ասել, երբեք չենք էլ խոսի, որոնք անմիջապես օժանդակում են  խրամատում կանգնած հայ զինվորին»,- ասաց նա:

«2005 թվականի սկզբին, երբ անդամակցեցինք կազմակերպությանը, զգուշացրեցին, որ հանկարծ գործունեություն չիրականացնենք Արցախում, մենք ձեզ կզրկենք լիցենզիայից: Իրավիճակը միայն մեզ մոտ չէ այդպես»,- վերջում ավելացրեց  «ՎիվաՍել-ՄՏՍ» ընկերության գլխավոր տնօրենը: