Այսօր Մայր թատրոնի խնդիրներով մտահոգ  ասուլիս էին հրավիրել բեմադրիչ Նիկոլայ Ծատուրյանն  ու ՀՀ ժողովրդական արտիստ Կարեն Ջանիբեկյանը: Երկուսի ախտորոշումն էլ նույնն էր. Թատրոնն արդեն բորբոսնած է.իսկ Սունդուկյանի անվան թատրոնը դարձել է շոուների թատրոն, այս թատրոնը պետք է փակվի, վերանայվի ռեպերտուարային քաղաքականությունը:

Ծատուրյանը համոզված է, որ թատրոնում մտքի և հոգու սնունդ տվող արվեստ չկա, պետք է այնպիսի ներկայացումներ բեմադրվեն, որոնք հուզեն մարդկանց. «Արվեստում նոր ոճ է առաջ եկել` խրխինջիզմ: Չենք ցանկանում Գ.Սունդուկյանի անվան ազգային ակադեմիական թատրոնում բեմադրված տեսնել այդ 8 ու կեսերը, 64 ալիքներն ու 96 ատամները, որոնք հանդիսատեսին ոչ մտածելու, ոչ էլ հուզվելու նյութ են տալիս»:

Ծատուրյանը ռեժիսոր է ու համոզված է, որ երբ թատրոնում գլխավորը դառնում է տնօրենը, ամեն ինչ վերջանում է, քանի որ նա սկսում է մտածել «փող աշխատելու մասին», այնինչ` թատրոնի հիմնական դեմքը պետք է լինի բեմադրիչը: Այո, Վահե Շահվերդյանը քանդեց թատրոնը, մեր քիչ թե շատ շնորհալի ու հայտնի դերասանները հեռացան, եթե ոչ երկրից, ապա թատրոնից:

Ծատուրյանը միշտ էլ ասել է, որ չպետք է կառչել աթոռին ու թույլ չտալ երիտասարդներին առաջ գնալ: Նա որպես Սունդուկյան թատրոնի բեմադրիչներ տեսնում է Լիլի Էլբակյանին, Նարինե Գրիգորյանին, Արմեն Խանդիկյանին, Ռուբեն Բաբայանին:

Կարեն Ջանիբեկյանը նկատեց, որ հեռուստաընկերությունները անճաշակությամբ են «կերակրում» հանդիսատեսին` փոխելով ընդհանուր ճաշակը: Նրա համոզմամբ` չպետք է հապաղել, Սունդուկյան թատրոնում պետք է նշանակել գեղարվեստական ղեկավար, որը ոչ թե ֆինանսիստ պետք է լինի, այլ պետք է որոշի թատրոնի էսթետիկական կողմը, լինի թատրոնի դեմքը:

«Թատրոնը պետք է ղեկավարվի միանձնյա, մեկը պետք է լինի թատրոնի տերը, թատրոնն ունենա իր մտածողությունը, իր խնդիրները: Գեղարվեստական ղեկավար եղավ, թատրոնը կվերածնվի»,-  ասում է արտիստը: Նա այն մարդկանցից էր ով Վահե Շահվերդյանի ղեկավարման տարիներին լքեց թատրոնը, քաշվեց առանձնացավ: Սակայն այսօր ցանկանում է դերեր ստանալ ու խաղալ.իսկ որպես Սունդուկյանի թատրոնի գեղարվեստական ղեկավար տեսնում է Նիկոլայ Ծատուրյանին:«Վահե Շահվերդյանը էսթետիկան գավառական էր», -ասաց նա: