Ապրիլյան չորսօրյա պատերազմից կես ամիս անց շարունակում է անհայտ մնալ կապիտան, վաշտի հրամանատար Արգիշտի Գաբոյանի ճակատագիրը:

Նրա հետ կապված որեւէ տեղեկատվություն չունի ոչ ԼՂՀ  գերիների, պատանդների եւ անհայտ կորածների հարցերով զբաղվող հանձնաժողովի նախագահ Վիկտոր Քոչարյանը, ոչ «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը:

«Որեւէ նորություն չկա: Եթե լինի՝ դուք առաջինը կիմանաք, չկա որեւէ նոր բան…մի շտապեք, մի շտապեք»,- մեզ հետ զրույցում ասաց Քոչարյանը:

«Որեւէ նոր բան չկա: Հակառակը՝ լռություն է տիրում այդ դաշտում»,- հավելեց Լարիսա Ալավերդյանը:

Օդում կախված է շարունակում մնալ տեղեկատվությունը, որ ադրբեջանական կողմում մեկ հայ զինծառայողի դի կա եւ եթե հաստատվի՝ կփոխանցվի հայկական կողմին: Ինչպես հայտնի է՝ ավելի ուշ տեղեկատվություն տարածվեց, որ այդ դին ոչ թե հանձնվելու է, այլ փոխանակվելու: Բայց քանի որ հայկական կողմում ադրբեջանցու դի չկար՝ փոխանակում չէր կարող լինել, ուստի պարզ չդարձավ՝ այդ դեպքում ի՞նչ է տեղի ունենալու Ադրբեջանում գտնվող դիակի հետ:

Քոչարյանն ու Ալավերդյանը այս կապակցությամբ որեւէ նորություն չունեն: Լռություն է պահպանում նաեւ Կարմիր խաչի միջազգային կոմիտեն, որ դիակի մասին տեղեկատվությունը փոխանցել էր Գերիների եւ անհետ կորածների հանձնաժողովին:

Մինչդեռ Գաբոյանի հարազատները, ոմանք Ղարաբաղում, ոմանք Շիրակի մարզի Մեծ Մանթաշ գյուղում, շարունակում են րոպե առ րոպե սպասել տեղեկատվության:

Եղբորորդու մասին տեղեկատվություն հայթայթելու նպատակով Ղարաբաղ մեկնած Սեյրան Գաբոյանը Թալիշից մեզ փոխանցեց, որ ոչ ոք իրենց ոչինչ չի ասում: «3 եղբայրներով Թալիշում ենք: Ոչ մի նորություն չկա: Կարմիր խաչը բանակցությունները գաղտնի է պահում դիակի հետ կապված բանակցությունները, իսկ մենք ուրիշ աղբյուր չունենք տեղեկություն իմանալու: Մեզ ասել են, որ այսօր պետք է Կարմիր խաչի ներկայացուցիչները չեզոք գոտում ինչ-որ գործողություններ իրականացնեն: Տեսնենք, եթե այսօր էլ որեւէ բան չպարզվի՝ երեւի գնանք տուն, սպասենք»,- ասաց Սեյրան Գաբոյանը:

Հիշեցնենք, որ ապրիլի 17-ին ԼՂՀ ՊԲ-ն հաղորդագրություն էր տարածել՝ տեղեկացնելով, որ ՊԲ զինծառայողների կողմից հայտնաբերված չնույնացված (unidentified) առարկան նմանեցվել է (resembled) դիակի հետ, ինչը կարող է հաստատվել միայն որոնողական աշխատանքների արդյունքում: Կարմիր խաչի միջազգային կոմիտեի և ԵԱՀԿ Մինսկի խմբի գործող նախագահի անձնական ներկայացուցչի  դաշտային օգնականների միջնորդությամբ, ապրիլի 17-ին հայկական կողմը ադրբեջանական կողմին թույլատրել էր շփման գծի հյուսիսային ուղղությամբ շարունակել դեռևս ապրիլի 8-ից սկսված զոհվածների դիակների որոնողական աշխատանքները:

Աղբյուրը armtimes.com