Եզդիների մոտ ընդունված չէ նահատակների հետևից լաց լինել. Tert.am-ի հետ զրույցում ասաց «Սինջար եզդիների ազգային միավորում» ՀԿ-ի նախագահ Բորիս Մուրազին: «Մեզ մոտ նման խոսք կա՝ նահատակները չեն մեռնում և պետք չէ նահատակների հետևից լաց լինել, որովհետև թե՛ այստեղ, թե՛ Իրաքում մեր նահատակները ընկնում են սուրբ գործի համար, և մենք բոլորս էլ պարտավոր ենք կիսատ թողած գործը շարունակել»,- ասաց նա:
Բորիս Մուրազին նշեց, որ արդեն իսկ հաստատված եզդի մեկ զոհ ունեն՝ շարքային Սլոյան Քյարամը՝ ծնված 1996թ.-ին և իր տեղեկություններով անհետ կորած զինվորների մեջ էլ ազգությամբ մեկ եզդի զինվոր կա:
«Այլ տեղեկություններ չունենք: Մենք համարում ենք ադրբեջանական բանակի գործողությունները ահաբեկչական, որը միանշանակ «Իսլամական  պետության» գործելաոճին համարժեք զորք ունի և որին բանակ ասել տեղին չի լինի, որովհետև նրանք զինվորների էին գլխատել, անարգել էին դիակները, որը խոսում է նրանց տեսակի մասին»,-ասաց նա:
Բորիս Մուրազին նաև նշեց, որ եզդի համայնքից էլ կամավորներ գնացել են Արցախ, բայց եզդիների առանձին ջոկատ, որպես այդպիսին, չկա: «Ես կարծում եմ նման ջոկատների կարիք էլ չկա, քանի որ ծառայած եզդիները ինչպես մյուս ՀՀ ծառայած քաղաքացիները, պահեստազորի անդամ են և եթե  մոբիլիզացիա սկսի, բոլորը պետք է գնան, եթե նրանց կանչեն»,- ասաց նա:

tert.am