Երևանը կշարունակի ռուսական գազի դիմաց վճարել դոլարով՝ այսօր հայտնեց Էներգետիկայի և բնական պաշարների նախարար Լևոն Յոլյանը:
«Բանակցությունները ընթանում են զուտ դոլարով գնման մասին: Նման խնդիր [ռուբլով վճարումների մասին] չի քննարկվել», — ասաց Յոլյանը:
Փաստորեն, այդ հարցն անգամ Յ չի քննարկվել, մինչդեռ մոտ կես տարի առաջ՝ անցած սեպտեմբերին, Բելառուսում տեղի ունեցած ԵՏՄ միջկառավարական խորհրդի նիստին վարչապետ Հովիկ Աբրահամյանը առաջարկեց միության անդամ-պետությունների միջև էներգակիրների առևտուրն իրականացնել ռուբլով, ոչ թե դոլարով:
Արժեզրկված դրամի և ռուբլու պայմաններում գազի դիմաց դոլարով վճարելը լրացուցիչ բեռ է հայաստանյան գործարարների համար, որոնք իրենց արտադրանքը իրացնում են դրամով կամ ռուբլով: Ստացած դրամն ու ռուբլին թանկ դոլարի վերածելով՝ հայաստանցի գործարարները ավելի շատ գումար են հատկացնում կապույտ վառելիքին՝ արդյունքում ռուսաստանցի արտադրողի հետ հայտնվելով անհավասար պայմաններում:
«Հայկական ժամանակի» տնտեսական մեկնաբան Հայկ Գևորգյանի խոսքով, Մոսկվան դժվար թե համաձայնի գազը վաճառել ռուբլով կամ դրամով, որովհետև իր տնտեսության համար դժվարին ժամանակներում արտարժույթի կարիք ունի․ — «Թեկուզ Հայաստանի շուկան շատ փոքր է, բայց տարեկան մոտ 300 միլիոն դոլար գումար է տրամադրում Հայաստանը Ռուսաստանից ստացված գազի դիմաց»:
Լևոն Յոլյանն ուղեկցում էր նախագահ Սերժ Սարգսյանին՝ անցած շաբաթ կայացած մոսկովյան այցելության ընթացքում: Հենց այդ այցի ընթացքում էր սպասվում, որ նոր փաստաթուղթ կստորագրվի Հայաստան առաքվող գազի գնի վերաբերյալ:
Անցած տարվանից ռուսական գազի հազար խորանարդ մետրը Հայաստանի հետ սահմանին արժե 165 դոլար, սակայն այդ գինը գործում է մինչև այս ապրիլի 1-ը: Հայաստանի իշխանությունները դեռ անցած տարվա նոյեմբերին դիմել էին Կրեմլին՝ գինն իջեցնելու առաջարկով, որովհետև ԵՏՄ անդամ այլ երկրներում գազն ավելի էժան է: Սակայն Սերժ Սարգսյանի մոսկովյան այցելության արդյունքում ոչ միայն չստորագրվեց գազն ավելի էժան վաճառելու մասին պայմանագիր, այլև չերկարաձգվեց 165 դոլարի մասին փաստաթուղթը:
«Բանակցություններն ընթացքում են, համապատասխան աշխատանքներ այդ ուղղությամբ գնում են: Երբ վերջնական պատկերը կլինի՝ միանգամից կտեղեկացնենք մեր հանրությանը ձեր միջոցով», — նշեց Էներգետիկայի և բնական պաշարների նախարարը:
«Ազատության» հարցին՝ հնարավո՞ր է, որ պայմանագիր չկնքվի և Հայաստանի ապրիլի 1-ից 189 դոլար վճարի գազի դիմաց, Յոլյանն արձագանքեց՝ «չեմ կարծում»:
Ինչ վերաբերում է ձգձգման պատճառներին՝ նախարարն ասաց՝ աշխատանքային գործընթաց է, որը ընթանում է:
«Ըստ իս՝ մոտակա ժամանակներս մենք ձեզ կտեղեկացնենք վերջնական լուծումների և պայմանավորվածությունների վերաբերյալ», — ասաց նա:
Սերժ Սարգսյանի մոսկովյան այցից առաջ Հայաստանի իշխանությունները կարծես վստահ էին, որ առնվազն 165 դոլարի մասին փաստաթուղթ իրենց կհաջողվի ստորագրել: Համենայնդեպս, նախագահ Սարգսյանի Ռուսաստան մեկնելու օրը՝ անցած հինգշաբթի, փոխարտգործնախարար Շավարշ Քոչարյանը լրագրողների հետ զրույցում հայտարարեց՝ փաստաթղթի նախագիծն արդեն պատրաստ է: Երբ այսօր Լևոն Յոլյանից հետաքրքրվեցինք՝ եթե նախագիծը պատրաստ էր, ինչու՞ այն չստորագրվեց, նորանշանակ նախարարը արձագանքեց․ — «Ես խնդրում եմ նման հարցերով դիմել պարոն Քոչարյանին, եթե ինքն էր համոզված: Ես սպառիչ տեղեկատվություն ձեզ ներկայացրեցի: Նման պրոտոկոլ ստորագրելու խնդիր այս այցի ժամանակ չկար»:
- 14:10Ուժեղ մագնիսական փոթորիկ մայիսի 31-ին. վտանգավոր երկրափոթորիկ կհարվածի երկրին
- 14:10Եթե Ադրբեջանի և Հայաստանի միջև կնքվի խաղաղության վերջնական համաձայնագիր, դա դրական ազդեցություն կունենա ողջ տարածաշրջանի վրա․ Թուրքիայի ԱԳ նախարար
- 12:10Ֆիդանը 4 հայկական գյուղերի հանձնման մասին. Թուրքիան լիովին աջակցում է Ադրբեջանին
- 14:10Իրանի և Ռուսաստանի հարաբերություններում փոփոխություն չի լինի․ Լավրով
- 14:10Ուկրաինայի կապիտուլյացիայից հետո Զելենսկին պետք է ձերբակալվի և դատարանի առաջ կանգնի կամ չեզոքացվի՝ որպես ահաբեկիչ․ Մեդվեդև
- 11:10Իրանի նախագահի ուղղաթիռը վթարի է ենթարկվել տեխնիկական անսարքության պատճառով. ԻՐՆԱ
- 12:10«Ոչ ոք չի կարող պառակտում մտցնել Իրանի և Ադրբեջանի միջև»
- 11:00Իրանի նախագահն ու արտաքին գործերի նախարարը մահացել են ուղղաթիռի վթարի հետևանքով
- 13:10Պենտագոնը հրաժարվել է թույլ տալ Ուկրաինային ամերիկյան զենքով հարվածել Ռուսաստանին
- 12:10Լուկաշենկոն, այցելելով իր եղբորը՝ Ալիևին, հիշել է «ձեր ազատագրական պատերազմի» նախորդած ընթրիքն ու իր խորհուրդները