Երեքշաբթի օրը Ադրբեջանի միանգամից երեք քաղաքներում բողոքի տարերային ակցիաներ էին: Երկրի հարավում` Լենքորանում, ռուս-ադրբեջանական սահմանից ոչ հեռու` Սիյազան քաղաքում, ինչպես նաև հայ-ադրբեջանական շփման գծից ընդամենը 40 կիլոմետրի վրա գտնվող Աղջաբեդիում ցուցարարները միևնույն պահանջն էին առաջ քաշում` զսպել մանաթի արժեզրկմանը հաջորդած գների կտրուկ աճը:

Երեկոյան կողմ արդեն պարզ դարձավ, որ բողոքի գործողությունների նման ծավալն անհանգստացնում է ադրբեջանական իշխանություններին: Նման մտահոգության ամենավառ ապացույցը դարձավ կառավարության որոշումը, որով չեղյալ հայտարարվեց ամենալուրջ դժգոհությունների առիթ տված նորամուծություններից մեկը: Խոսքը հունվարի 1-ից ուժի մեջ մտած այն որոշման մասին է, որի համաձայն՝ ալկոհոլային խմիչքների մանրածախ և ծխախոտի մեծածախ առևտուրը երկրի տարածքում իրականացվում էր բացառապես պլաստիկ քարտերով:

Ինչպես haqqin.az-ին հայտնել է Ֆիզուլիի շրջանի գործադիր իշխանության ղեկավարի մամուլի քարտուղար Բայրամ Նիֆթալիեւը, շրջանում կատարվել են տեղի բնակիչների պահանջները, որոնք նախօրեին բողոքում էին մթերքների գների բարձրացման դեմ:

«Վերջին մի քանի օրերին 50-կգ-անոց պարկ ալյուրը վաճառվում էր 30-35 մանաթով: բողոքի ակցիայից հետո, բանակցությունների արդյունքում ալյուրի մեծածախ առեւտրի կետերը նվազեցրել են գները: Հիմա մեկ պարկ ալյուրը վաճառվում է 25-28 մանաթով: Կանխվում է նաեւ այլ մթերքների գների արհեստական բարձրացումը»,-ասել է Նիֆթալիեւը:

Փաստորեն, Ադրբեջանում գների բարձրացման դեմ ուղղված զանգվածային բողոքներն արդյունք են տալիս: