Գրասէր հասարակութիւն մը փութացած էր Կլենտէյլի Սուրբ Գրիգոր Լուսաւորիչ եկեղեցւոյ Ռեմոն Գույումճեան սրահը, Ուրբաթ, 4 Դեկտեմբերի երեկոյեան, ներկայ գտնուելու բանաստեղծ ՀԱՅԿ ՀՐԱՅՐ (ԵՂԵԱՆ)ի «ԱՂՕԹՈՂ ՄԵՂԵԴԻՆԵՐԻ ՎԵՐԱԴԱՐՁԸ» բանաստեղծութեանց բազմերանգ հատորին հրապարակային ներկայացումին, որ բարեբախտ զուգադիպութեամբ հեղինակին ծննդեան 60-ամեակին յիշատակութեան առիթն ալ էր: Հանդիսութիւնը, որ կազմակերպուած էր Լոս Անճելըսի Թէքէեան Մշակութային Միութեան Մասնաճիւղին կողմէ, կոկիկ ու համադրուած յայտագիրով մը ընթացք առաւ, երբ վարչութեան ժրաջան անդամ, գրականագէտ Լիլիթ Քէհէեան հանդիսութեան բացման խօսքը կատարեց: Քէհէեան անդրադարձաւ Հայկ Հրայրի կեանքին, ստեղծագործական ճաշակին ու ընդհանրապէս մարդու ներքին տագնապի՝ հեղինակին կողմէ ընկալումին: Հեղինակը ծնած է Էջմիածին 1955-ին ու յաճախած տեղւոյն բարձրագոյն կրթարանը, ապա՝ մնայուն անհանգստութեան հետեւանքով տեղափոխուած Միացեալ Նահանգներ, ուր կը շարունակէ գրական իր ստեղծագործութիւնը, գամուած իր շարժաթոռին: Յայտագրի առաջին ելոյթով հանդէս եկաւ յայտնի նկարիչ, քանդակագործ եւ բանաստեղծ Արմէն Պօղոսեանը, որ իր բովանդակալից վերլուծումով դրուատեց Հայկ Հրայր բանաստեղծին լոյս ընծայած հատորին մէջ արտայայտուած ներաշխարհը: Ապա, գրողի բարեկամներէն Սվետլանա Տօնապետեանը, շնորհաւորական կարճ խօսքով հեղինակին ծննդեան 60-ամեակին առիթով սրտագին մաղթանքներ կատարեց: Սրտի խօսքով հանդէս եկաւ հայրենի ծանօթ մտաւորական եւ հեղինակին մօտիկ բարեկամ Էտուարտ Հախվերդեանը: Ապա՝ հեղինակին քրոջ թոռնուհին, փոքրիկն Լիլիթ Նարկիզեանը շնորհալի ասմունքով ներկայացուց նորատիպ հատորէն գեղեցիկ քերթուած մը, խլելով ունկնդիրներուն քաջալերական ծափերը: Յայտնի երաժիշտ Ալպերթ Վարդանեան տուտուկի եւ շուիի վրայ բարձրորակ կատարումով մը ներկաներուն յաջորդաբար հրամցուց «Կիլիկիա» եւ «Կաքաւիկ» սիրուած երգերը: Հանդիսավար Լիլիթ Քէհէեան ներկայացուց Հայկ Հրայր բանաստեղծին գրական հարուստ վաստակը, անոր հրատարակած տաս հատորներուն մէջ տեղ գտած հմայիչ ստեղծագործութիւնները, որոնք հաւաքաբար հեղինակին կը շնորհեն «սիրոյ երգիչ» գեղեցիկ որակումը: Յայտագրի սրտի խօսքի բաժինը համալրեց յայտնի մտաւորական Ռոպերթ Սարգսեան, համակրանքի իր արտայայտութեամբ: Գեղարուեստական յայտագրի երկրորդ բաժինով Ծովինար Սարգսեան ասմունքով հանդէս եկաւ, իսկ Վարդան Թաշճեան կիթառի վրայ ընկերակցեցաւ ծանօթ մեղեդիներով ու աւարտեց յայտագիրը նոր երգերու մեկնաբանութեամբ: Յուզիչ բայց տոգորուած՝ շարժաթոռի վրայ բազմած, մեծարուող հեղինակը իր սրտի բովանդակալից խօսքով շնորհակալութիւն յայտնեց յայտագրի մասնակիցներուն, իր նուիրեալ բարեկամներուն եւ կազմակերպիչ Թէքէեան Մշակութային Միութեան: Փակման կարճ խօսքով հանդէս եկաւ «Երգ Երգոց» հայ աւետարանական եկեղեցւոյ հովիւ Յովհաննէս Արսէնեանը: Յայտագրի աւարտին տեղի ունեցաւ աւանդական ճոխ հիւրասիրութիւն մը եւ հեղինակի հատորին մակագրումը: Գնահատելի միջոցառում մըն էր հրամցուած գրական այս հանդիսութիւնը:

Արա Ահարոնեան