Ռուսաստանն իր ռազմական ուժերն ամրապնդել է ու իր մասին հայտարարել միջազգային ասպարեզում սառը պատերազմի ժամանակներից ի վեր չտեսնված վստահությամբ՝ այդպիսով մեծացնելով Արևմուտքի հետ հարաբերությունների լարվածությունը: Մոսկվայի նման գործողություններում փորձագետները տեսնում են լայնածավալ զինված հակամարտության հնարավոր նախապատրաստություն: Այս մասին գրում է The New York Times-ը «Ռուսաստանը վերազինվում է նոր դարաշրջանի համար» վերտառությամբ հոդվածում (1in.am):

Աշխարհում իր ազդեցությունը վերադարձնելու համար Ռուսաստանը, մասնավորապես, սկսել է Արկտիկայում ավելացնել իր բազաների թիվը և ընդլայնել հին տարածքները՝ գրում է պարբերականը: Վերլուծաբանների կարծիքով՝ այստեղ Մոսկվայի ջանքերը մասամբ կապված են կլիմայի փոփոխությունների հետ, քանի որ երկիրը ձգտում է օգտագործել ու պահպանել ծովային առևտրային ուղիները և շրջաններում նավթագազային ռեսուրսները, քանի որ սառույցների հալչելու պատճառով դրանք առավել հասանելի են դարձել:

Պարբերականը ուշադրություն է հրավիրում ՌԴ բյուջեի վրա, որը անշեղորեն աճում է: Մոսկվան զգալիորեն մեծացրել է իր ռազմական բյուջեն՝ 2015-ին հատկացնելով 11 մլրդ դոլար ավելի՝ նախորդ տարվա համեմատ:

Ռուսաստանը ծրագրել է 100 հազար զինծառայողի մոբիլիզացիա, ինչպես նաև արտապլանային զորավարժություններ՝ 1000 զինվորների մասնակցությամբ: «Սրանք զորքերի մարտական պատրաստականության գործողություններ են, ինչպես նաև աշխարհին ռազմական ուժի ցուցադրում: Հաճախ դրանց մասնակցում են ստորաբաժանումներ, որոնք կառավարում են Ռուսաստանի միջուկային սպառազինությունը՝ այդպիսով ուշադրություն հրավիրելով երկրի միջուկային հնարավորությունների վրա: ՆԱՏՕ-ն դրան արձագանքել է իր զորավարժությունների ավելացմամբ»,- գրում է պարբերականը:

«Ռուս պաշտոնական աղբյուրների փոխանցած պատկերը վկայում է այն մասին, որ նրանք նախապատրաստվում են լայնածավալ միջպետական պատերազմի: Այստեղ խոսքը խաղաղապահ նպատակների մասին չէ կամ հակակառավարական ուժերի հետ պայքարի»,- ասել է փորձագետը:

ՌԴ-ն նաև գնում, թարմացնում և մշակում է ռազմական տեխնիկա՝ մինչև 2020-ը իր պաշտպանական ունակությունները 70 տոկոսով արդիականացնելու նպատակով:

Պարբերականը հիշեցնում է ռուսական ինքնաթիռների կողմից այլ պետությունների օդային սահմանները խախտելու մասին և այն մասին, որ Մոսկվան իր զինվորականներին ուղարկում է օտարերկրյա հակամարտություններին մասնակցելու, օրինակ՝ Սիրիա: NYT-ն չի մոռանում նաև Ուկրաինայում և Վրաստանում տեղի ունեցած հակամարտություններում ՌԴ դերակատարման մասին:

1in.am