Այսօր  Գրիգոր Լուսավորիչ բժշկական կենտրոնում կարճ հայտարարությամբ հանդես եկավ ազատամարտիկ, դաժան ծեծի ենթարկված Սմբատ Հակոբյանը: Նա նշեց, որ իրեն ծեծի են ենթարկել  վեց-յոթ հոգով: Ազատամարտիկի խոսքով՝ ինքը ճանաչում է միայն նրանցից մեկին: Ազատամարտիկն ասաց, որ իրեն ծեծի ենթարկողներից մեկը ՀՖՖ նախագահ Ռուբեն Հայրապետյանի թիկանզորի անդամներից է եղել` Տիգրան անունով: Միևնույն ժամանակ, ըստ ազատամարտիկի, այս պահին չի կարող պնդել, որ Տիգրանն աշխատում է Հայրապետյանի թիկնազորում:

Ազատամարտիկը պատմեց, որ ակցիան նորմալ ընթացել է, որից հետո երբ ինքը որոշել է քայլել դեպի Աբովյան փողոց, իրեն են մոտեցել մի քանի քաղաքացիներ և առաջարկել զրուցել կիսակառույց շինության տարածքում: «Երբ ես Մելիք- Ադամյան փողոցից շարժվեցի տեսա, որ մի երեք-չորս հոգի շարժվեցին ոտքով, մեկը ձայն տվեց, ասեց, թե Սմբատ այնտեղ էի ուզում մոտենալ, բայց հարմար չէ, բան ունեմ քեզ ասելու, ու ձեռքով հրում է  դեպի դարպասից ներս: Ասի, եթե ասելու բան կա, ստեղ ասա, ինչու ես հրում: Իրանք երեք հոգի էին, հրեցին ցանկապատից ներս մտցրեցին, այնտեղ մի անձնավորության տեսա, որից երկար տարիներ ճանաչում եմ, հանդիպել եմ, անունը Տիգրան է, նա Հայրապետյանի թիկնազորից էր»,- պատմեց ազատամարտիկը: Նա ապա պատմեց, որ հիշյալ Տիգրանը ձեռքով հարվածել է իրեն, ևւ ասել.«Հիմա կբացատրենք, թե ինչ ենք անում, ու սկսեցին ծեծել: Տղավարի ասեմ, որ ես էլ տակ չեմ մնացել, բայց իրանք շատ էին»:Միևնույն ժամանակ Սմբատ Հակոբյանն ասաց, որ Ռուբեն Հայրապետյանի հետ որևէ անձնական խնդիր չի ունեցել: Ընդամենը մեկ անգամ իր և Հայրապետյանի միջև բանավեճ է եղել,  որի ժամանակ էլ ՀՖՖ նախագահն ասել է, որ «սպասի կտեսնես»: