Վարչապետ Տիգրան Սարգսյանն օգոստոսի 27-ին Ծաղկաձորում հանդիպել է ՀՀ վարչապետին առընթեր ազգային երիտասարդական քաղաքականության խորհրդի հասարակական սեկտորը ներկայացնող անդամներին, երիտասարդական և ուսանողական կազմակերպությունների ներկայացուցիչներին: Վարչապետը փորձել է բացատրել երկրում տիրող վիճակի պատճառները.

Երիտասարդներից մեկը հետաքրքրվել է. Թե` ըստ Հայաստանի ազգային վիճակագրական ծառայության տվյալների՝ նախորդ տարի մեր երկրում աղքատության մակարդակը 34,1 տոկոս է կազմել, 2008 թ.՝ մոտավորապես 23,5 տոկոս: Այսինքն, եթե 2008թ. յուրաքանչյուր 4-րդ մարդն էր աղքատ, ապա 2010թ.` յուրաքանչյուր երրորդը: Սա այն դեպքում, երբ այդ ժամանակահատվածում Հայաստանն ունեցել է տնտեսական աճ: Ինչո՞վ է պայմանավորված կենսամակարդակի նման անկումը:

Տիգրան Սարգսյանը պատասխանը, որ ավելի շուտ հիշեցնում է բաց դաս  կարծես արդարացում է փնտրում, սակայն այն ինչին դատապարտված է մեր երիտասարդությունը, իր ապաշնորհ կառավարման արդյունքում որևէ արդարացում չունի:

«Մենք այդ տարիներին տնտեսական անկում ենք ունեցել: Աղքատությունը չափվում է տարբեր մեթոդներով: Մենք ունենք աղքատության հաղթահարման ռազմավարություն և ծրագիր: Արդեն շուրջ 10 տարի է՝ այս խնդիրը մեր երկրի առջև ծառացած թիվ մեկ մարտահրավերն է, որովհետև 21-րդ դարում աղքատություն ունենալն անթույլատրելի է: Վերջին 10 տարիների ընթացքում մենք արձանագրել էինք լուրջ առաջընթաց, բայց ցավոք սրտի, 2009-2010 թթ. ունեցանք նահանջ, քանի որ տեղի ունեցավ լրջագույն տնտեսական անկում, ինչի պատճառով մեր բնակչության եկամուտները նվազեցին, իսկ դրա հետ զուգահեռաբար սոցիալական վիճակը վատթարացավ:

Մեր հակաճգնաժամային ծրագրի բովանդակությունը հետևյալն է. չնայած այն հանգամանքին, որ ունեցանք տնտեսական անկում և պետական եկամուտների կտրուկ նվազում, մենք ոչ միայն չպետք է կրճատեինք պետության սոցիալական ծրագրերը, այլ հակառակը՝ պետք է ավելացնեինք դրանք: Չնայած 14 տոկոսանոց տնտեսական անկմանը՝ բարձրացրեցինք թոշակները, անապահով խավերի սոցիալական նպաստները, որպեսզի ավելացնենք նրանց դիմադրողականությունը, որպեսզի նրանք կարողանան այդ ճգնաժամային իրավիճակն ավելի հեշտությամբ հաղթահարել:

Գնաճը 2009-2010 թթ. Հայաստանի Հանրապետությունում աղքատության խորացման երկրորդ պատճառն էր: Մենք ունեցանք գների աննախադեպ բարձր մակարդակ: Մեզ համար մշտապես թիրախային ցուցանիշը եղել է 3 տոկոսանոց գնաճը, իսկ ճգնաժամային տարիներին ունեցանք գնաճի երեք անգամ ավելի բարձր ցուցանիշ, որը հասավ մինչև 10 տոկոսի:
Այսօր իրականացնում ենք մի քաղաքականություն, որի նպատակն է խթանել տնտեսական աճը, դիվերսիֆիկացնել տնտեսությունը, իսկ մյուս կողմից՝ զսպել գնաճը: Արդեն իսկ ունենք այս տարվա առաջին յոթ ամիսների ինֆլյացիոն ցուցանիշները, որոնք վկայում են, որ մենք արդեն բարձր գնաճային փուլից տեղափոխվում ենք միջին գնաճային փուլ և մեզ կհաջողվի այս տարի ունենալ 5 տոկոսանոց գնաճ, որը երկու անգամ ավելի ցածր կլինի նախորդ տարվա գնաճից, ավելի բարենպաստ պայմաններ կստեղծի՝ 2012թ. գնաճի դեմ պայքարելու համար: Մյուս կողմից, այս տարի կանխատեսում ենք 4,6 տոկոսանոց տնտեսական աճ և, բնականաբար, այն ավելի բարենպաստ պայմաններ կստեղծի աղքատության կրճատման համար», — ասել է վարչապետ Սարգսյանը:

Նա նաև խոսել է երիտասարդների կենցաղային պայմանների բարելավման անհրաժեշտության մասին. Ըստ վարչապետի կառավարությունն աշխատանքներ է տանում, որպեսզի երիտասարդների համար կենցաղային ապրանքների, այդ թվում` ավտոմեքենաների ձեռքբերումը հեշտացտացված տարբերակով արվի:  Նա նշել է, որ այսօր այդ ուղղությամբ աշխատանքներ են կատարվում Կենտրոնական բանկի կողմից, որն էլ շուտով կներկայացնի հայեցակարգը:

«Ցանկացած մարդ Հայաստանի Հանրապետությունում պետք է գիտակցի, որ եթե նա ունի աշխատանք, եթե նա կարողանում է իր ինտելեկտուալ կարողություններն իրացնել Հայաստանի Հանրապետությունում, ապա նա չպետք է ունենա կենցաղային խնդիրներ: Իհարկե, խոսքն առաջին հերթին վերաբերում է բնակարանին, ավտոմեքենային, բնակարանը կահավորելուն, պատշաճ ձեւով վերանորոգելուն եւ այլն»,- ասել է Տ. Սարգսյանը, հիշեցնելով, որ պետությունն արդեն իսկ սուբսիդավորում է երիտասարդ ընտանիքների հիփոթեքային վարկավորումը:

Հ.Գ. Եւ սա այն դեպքում, երբ երեկ Ծաղկաձորում հավաքված երիտասարդ գիտնականները, կամ ավելի ստույգ` գիտությամբ զբաղվող երիտասարդները, ովքեր ունեն և աշխատանք, և ինտելեկտուալ կարողություններ, և դրանք իրացնում են ամսական 35 -40 հազար դրամով, դառնացած պատմում էին, որ չեն կարող երազել անգամ ամենաբնական պահանջի` ամուսնանալու մասին, չնայած վաղուց արդեն հատել են այդ տարիքը, ուր մնաց մտածեն սեփական բնակարանի, այն պատշաճ վերանորոգելու,  ավտոմեքենայի, ու այլ առաջնահերթությունների մասին: