Մեր երկրի հարկային քաղաքականությունը շատերի դժգոհություն է առաջացնում: Պարբերաբար դրանց անդրադարձ լինում է, իհարկե, սակայն այն ի օգուտ սովորական տնտեսվարողի դառնալու փոխարեն, մնում է նույնը՝ տարեցտարի նոր մտահոգիչ երանգներ ավելացնելով եղածին:

Մանր ու միջին բեզնեսի ներկայացուցիչները մեզանում հավիտենական բողոքավորների կարգավիճակում են. նրանցից մեկն իր վրդովմունքը կիսեց «ՀայկականՎարկածի» հետ:

«Աշխարհն առաջ է գնում, օր-օրի  ի նպաստ աշխատող մարդու օրենքներ են փոխվում, մեզ մոտ նույն է, եղածն էլ գնալով  վատանում է: Հարկայինից մտել են խանութ, 6 հազար դրամանոց ապրանք են գնել: Աշխատողներից այդ պահին միայն մեկն է եղել, մյուսը զբաղված էր: Սա էլ  նոր աշխատող է, չեկը չի տպել: Դե չգիտի ապարատի հետ վարվելու ձևը, նոր պիտ սովորի: Հիմա իրանց ոնց բացատրեմ, որ նոր աշխատող է, նոր է սկսել աշխատել աղջիկը, չի հասկանում դեռ:

Ու ոչ ոք հաշվի չի առնում, որ աշխատող չկա, փողոցից աշխատող ենք վերցնում: Անգրագետ, շշմած — շվարած, անխնամ, տանը հազար խնդիր ունեցող  մարդիկ են գալիս:  Չես հասկանում ով են, ինչ են: Մինչև սովորացնում ենք… թող նախ այդ հարցը լուծեն,  օգնեն, որ որոշակի կրթություն ունեցող մարդիկ լինեն, մենք էլ ընտրության հնարավորություն ունենանք:

Կամ, ի՞նչ է նշանակում եկել, հանել են խրձով հանձնարարականները, թե՝ բոլոր փոքր և միջին խանութներին պետք է տուգանենք:

Օրենքով, իբր տարին մեկ անգամ իրավունք ունեն տուգանելու, Փաստորեն իրենք տարին ուրիշ կերպ են հաշվում՝ տուգանքից — տուգանք է մեկ տարին:

Առաջին անգամ 150.00 դրամ, + 25.000 վարչական տույժ, երկրորդ անգամ տուգանում են  300.000 դրամ + 25.000 վարչական տույժ, և հինգ օր փակում են, եթե չես ուզում փակեն 300 հազար էլ պետք է լրացուցիչ վճարես:  Երրորդն էլ, երևի տանեն կախեն, չգիտեմ… ու սա վերաբերվում է փոքր և միջին բիզնեսին, կապ չունի ինչ ես վաճառում, առևտուր կա թե ոչ: Ու այս օրենքը արդեն քանի տարի է գործում է՝ ոչ մի բան չի փոխվում, կյանքը թանկացել է, մարդիկ առևտուր չեն անում, ում է հետաքրքրում, ինչ վիճակ է, թող դրա մասին մտածեն:

Մտածո՞ւմ են, որ փակում են: Սովորական աշխատողը 5 օր ինչ է ուտելու, չէ որ նրանք հացի փող են վաստակում,  կամ կարող է գնան ու չգան՝ էդ 5 օրը չսպասեն: Ու էլի շատ հարցեր, որ որևէ մեկին չի հետաքրքրում: Տեղյա՞կ են, որ մարդիկ կոպեկներ են աշխատում ու էդ կոպեկներով ապրող մարդու տուգանքները  անհամեմատ են: Տեղյա՞կ չեն, որ կրիզիս է, խայտառակ վիճակ՝ մարդիկ խանութները փակում են, չեն կարողանում աշխատել, իրենք էլ  բոլոր պայմանները ստեղծում են, որ եթե պետք է 5 հատ փակվի, միանգամից  50 հատ է փակվում: Բոլոր պայմանները ստեղծել են, որ Հայաստանում մանր ու միջինին բիզնես չմնա:

Խնայել չկա. թուրքը ապրանքը տալիս է, ասում է տար ծախի փողս կբերես, իսկ էստեղ ասում են՝ 6.000 դրամ չես խփել գնա ու ոչնչացի:

Իրենք ամեն ինչ անում են, որ դու իրենց խաբես, որովհետև դու չես կարողանում իր դրած պայմանով ապրել: Ստիպում են, որ խաբես, իրենք էլ գան բռնեն, բռնելուց էլ՝ 300.000 տուգանք:   Իսկ էդ մանր բիզնեսը ի վիճակի՞ է տալու, դու իր հարկերը նայել ե՞ս, դրա մուծումները տեսել ես, իսկ մտածել ես, որ սա աշխատող է պահում, էդ հինգ օրվա մեջ կլիենտուրա է կորցնում: Այս ամենը դիտմամբ է  արված, որ մանր ու միջին բիզնեսը վերացնեն, սա քաղաքականություն է: Իրենց մարդիկ մոլեր են բացել: Ինչքան մենք շատ մենք փակվենք, այդքան շատ իրանց մոլերը լավ կաշխատեն»: