Երևան քաղաքի ավագանու այսօրվա՝ նոյեմբերի 26-ի նիստում սկանդալ է եղել, «Բարգավաճ Հայաստան» խմբակցությունը բոյկոտել է նիստը՝ լքելով դահլիճը: Այս մասին news.am-ի թղթակցի հետ զրույցում ասել է Երևանի ավագանու ԲՀԿ խմբակցության ղեկավար Թամարա Պողոսյանը:

Նա նշել է, որ այսօրվա նիստի օրակարգում ընդգրկված էր 2015թ հունվարի 1-ից Երևանի քաղաքապետարանի 1782 աշխատակիցների մինչև 15 տոկոսով աշխատավարձը բարձրացնելու հարցը: Քննարկման ժամանակ ԲՀԿ-ն ներկայացրել է  իր դիրքորոշումը՝ հայտնելով, որ սոցիալական այսպիսի լարված և սուղ բյուջեի պայմաններում անընդունելի է այդ փոքր եկամուտները ամբողջությամբ ուղղել միայն աշխատավարձերի բարձրացմանը: «Տարոն Մարգարյանը չթողեց ավարտեմ խոսքս, չթողեց նույնիսկ ասեմ, որ դեմ ենք քվերակելու, ինձ իմպերատիվ զրկեց ձայնից:»,-ասել է նա:

Այնուհետև, ըստ տիկին Պողոսյանի, Ֆինանսական հանձնաժողովի նախագահ Նաիրա Նահապետյանը և քաղաքապետը հայտարարում են, որ խոսքը 7000 համայնքային աշխատակիցների մասին է, ինչը հարցեր է առաջացնում, քանի որ որոշման նախագծում ընդամենը 1782 աշխատակից է նշված եղել: Քվեարկությունից առաջ Թամարա Պողոսյանը կանոնակարգով իրեն վերապահված  ձայնի իրավունք է խնդրում, որպեսզի պարզաբանի այդ թյուրիմացությունը, սակայն այս անգամ ևս նրան ձայն չեն տալիս: Փոխարենը, Թամարա Պողոսյանի փոխանցմամբ, քաղաքապետը իրեն ասում է, թե գնացեք հրապարակում միտինգ արեք:

Այնուհանդերձ, քվեարկությունը տեղի ունեցավ, ԲՀԿ-ն դեմ քվեարկեց և դրանից հետո մեկ անգամ ևս վարման կարգի վերաբերյալ փորձեց պարզաբանում մտցնել, սակայն այս անգամ ևս Տարոն Մարգարյանը թույլ չտվեց նրան խոսել: Ի պատասխան բողոքի՝ ԲՀԿ խմբակցությունը բոյկոտեց ավագանու նիստը՝ լքելով դահլիճը: Թամարա Պողոսյանը իր վրդովմունքը հայտնեց, որ նման լուրջ փաստաթուղթը կարող են խեղաթյուրել և ճշտումներ մտցնելու հնարավորություն չտալ, մի ամբողջ խմբակցության իմպերատիվ ձևով զրկել ձայնից:

news.am