Այսօր լրագրողների հետ հանդիպման ժամանակ ՀՀ ոստիկանապետի տեղակալ Արթուր Օսիկյանը հայտարարեց, որ ճանապարհների և խաչմերուկների վրա տեսանկարահանող կամ լուսանկարահանող սարքերի տեղադրման արդյունքում ճանապարհային ոստիկանության պարեկային ծառայության աշխատակիցների մի մասը ավտոմատ կկրճատվի: Սակայն, ըստ Օսիկյանի, ազատված ավտոտեսուչները գործազուրկ չեն մնա և, ամենայն հավանականությամբ, համակարգում այլ աշխատանք կստանան:

Առանց դրա էլ բարեփոխումների արդյունքում ավտոտեսուչները գրեթե անգործ են մնացել: Նրանք, որպես կանոն, չեն կատարում իրենց հիմնական գործը. չգիտես ինչու, մեզանում ընդունված է, որ ՃՈ աշխատակիցները միայն խախտումեր արձանագրելու կամ տուգանելու համար են: Իսկ փողոցում երթևեկության կարգուկանոն հաստատելիս կամ խափանված մեքենայի օգնելիս, և այլ խնդիրների պահին նրանք անտարբեր են կամ անհետանում են զարմանալի արագությամբ:

Օսիկյանը տեղեկացրեց, որ սարքերի տեղադրման աշխատանքները իրականացնելու է շվեդական Sensis Trafik կազմակերպությունը` սեփական միջոցներով, և այս կազմակերպության մասնագետներն էլ իրականացնելու են սպասարկումը:

Պայմանագիրը կնքված է 25 տարով, ներդրումների չափը կկազմի 9.8 մլն եվրո: Այսինքն` սարքը կֆիքսի ավտոմեքենայի համարը, խախտման տեսակը ու բոլոր տվյալները կուղարկի համապատասխան տեսուչին, որն էլ կտրոնը կներկայացնի խախտումն իրականացրած ավտոմեքենայի տիրոջը: Այսպիսով, ըստ Օսիկյանի, կոռուպցիոն ռիսկերը գործնականում կվերանան:

Պայմանն այնպիսին է, որ շվեդական ընկերությունը որպես փոխհատուցում կստանա գանձված տուգանքների 70 տոկոսը` մինչև ներդրումների գումարը ամբողջությամբ վերադարձվի: Այնուհետև բյուջեի հետ հարաբերությունները կկարգավորվեն 50/50 սկզբունքով: Ըստ Օսիկյանի` դատելով այսօրվա պրակտիկայից, իրենք հույս ունեն, որ լավագույն դեպքում տուգանքների ընդհանուր չափը կկազմի տարեկան 200 մլն դրամ: Ստացվում է, որ ինչքան շատ տուգանեն, այնքան շուտ կմարեն պարտքը: