ՀՀ հատուկ քննչական ծառայությունում ավարտվել է ՀՀ քրեական օրենսգրքի 311-րդ հոդվածի 2-րդ մասով և 312-րդ հոդվածի 1-ին մասով` կաշառք ստանալու և կաշառքի միջնորդություն կատարելու դեպքի առթիվ հարուցված քրեական գործի նախաքննությունը:
Նախաքննությամբ պարզվել է, որ ՀՀ արդարադատության նախարարության «Վանաձոր» քրեակատարողական հիմնարկի անվտանգության ապահովման բաժնի կրտսեր մասնագետ Վարդան Ծատուրյանը կաշառք տվողի ներկայացրած անձանց օգտին ակնհայտ ապօրինի գործողություն կատարելու, այն է՝ արգելված իր հանդիսացող բջջային հեռախոսները հիշյալ հիմնարկի դատապարտյալներին փոխանցելու համար, 2014թ. մարտի 31-ին` ժամը 21-ի սահմաններում, Վանաձոր քաղաքում միջնորդի՝ նույն քրեակատարողական հիմնարկի պահպանության ապահովման բաժնի 3-րդ կարգի մասնագետ Մասիս Մարտիրոսյանի միջոցով ստացել է գործով չպարզված անձի կողմից իրեն փոխանցված 40.000 ՀՀ դրամ կաշառք, ինչպես նաև կպչուն ժապավենով փաթեթավորված հինգ բջջային հեռախոս ու կից պարագաներ:
Վարդան Ծատուրյանը նշված գումարը պահել է իր բնակարանում, իսկ բջջային հեռախոսներով և կից պարագաներով փաթեթը հաջորդ օրը, նախապես թաքցնելով համազգեստի բաճկոնի տակ, իր հետ մտցրել է «Վանաձոր» ՔԿՀ տարածք, սակայն չի հասցրել դրանք փոխանցել հիմնարկի դատապարտյալներին, քանի որ նույն հիմնարկի աշխատակիցների կողմից անձնական զննությամբ նրա մոտից առգրավվել են այդ բջջային հեռախոսները և կից պարագաները, իսկ 40.000 ՀՀ դրամը, որը թաքցրել էր իր բնակարանում, նա ինքնակամ ներկայացրել է քննությանը:
Հիշեցնենք, որ ՀՀ արդարադատության նախարարության «Վանաձոր» քրեակատարողական հիմնարկի անվտանգության ապահովման բաժնի աշխատակից Վարդան Ծատուրյանին մեղադրանք էր առաջադրվել ՀՀ քրեական օրենսգրքի 311-րդ հոդվածի 2-րդ մասով, իսկ նույն քրեակատարողական հիմնարկի պահպանության ապահովման բաժնի աշխատակից Մասիս Մարտիրոսյանին մեղադրանք էր առաջադրվել ՀՀ քրեական օրենսգրքի 313-րդ հոդվածի 2-րդ մասով:
Նախաքննությունն ավարտած քննիչը քրեական գործը մեղադրական եզրակացությամբ հանձնել է դատավարական հսկողություն իրականացնող դատախազին՝ այն հաստատելու և դատարան ուղարկելու համար:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Այս մասին տեղեկանում ենք ՀՀ հատուկ քննչական լրատվական ծառայությունից: