Ընդունելությանը մասնակցեց Չինաստանի ԱԳ նախարարի տեղակալ Վան Չաոն, ում հետ դեսպան Արմեն Սարգսյանն ունեցավ առանձնազրույց՝ քննարկելով երկկողմ հարաբերություններին առնչվող տարաբնույթ հարցեր:

Ընդունելության մասնակիցներին ներկայացվեց ՀՀ Անկախության 23-րդ տարեդարձի առթիվ դեսպանության կողմից լույս ընծայված «Armenia» անվանմամբ տեղեկատվական գրքույկը, որում մասնավորապես ներկայացված են Հայաստանի պատմությունը, մշակույթը, ներդրումային և զբոսաշրջային հնարավորությունները:

Նույն օրը դեսպանությունում տեղի ունեցավ ընդունելություն Պեկինում ուսանող հայ երիտասարդների համար:

***

Սեպտեմբերի 22-ին Ստրասբուրգում` Եվրոպայի խորհրդի կենտրոնակայանում, ԵԽ-ում ՀՀ մշտական ներկայացուցչությունը կազմակերպել էր ընդունելություն` Հայաստանի Անկախության 23-րդ տարեդարձի կապակցությամբ:

Ընդունելությանը ողջույնի խոսքով հանդես եկավ Եվրոպայի խորհրդում Հայաստանի Հանրապետության մշտական ներկայացուցիչ, դեսպան Արմեն Պապիկյանը:

Ողջունելով հյուրերին՝ դեսպան Պապիկյանն իր խոսքում ընդգծեց, որ արդեն 23 տարի է, ինչ Հայաստանի Հանրապետությունն ընթանում է ժողովրդավարության կառուցման անդառնալի ուղիով և այդ ճանապարհին կարևոր է նաև Եվրոպայի խորհրդի օժանդակությունը:

Խոսելով ՀՀ անկախության տարիների ձեռքբերումներից՝ ՀՀ մշտական ներկայացուցիչը նշեց, որ Հայաստանը դինամիկ զարգացող ժողովրդավարությամբ պետություն է՝ հիմնված ԵԽ արժեքների և սկզբունքների վրա: Մարդու իրավունքները, օրենքի իշխանությունը, ժողովրդավարությունը Հայաստանում զուտ կարգախոսներ չեն այլ` պետության զարգացման մարտավարության անքակտելի բաղադրիչներ:

Ընդունելությանը ներկա էին Եվրոպայի խորհրդի բարձրաստիճան պաշտոնյաներ, դիվանագետներ, Ստրասբուրգի տեղական ինքնակառավարման մարմինների, հասարակական կազմակերպությունների և հայ համայնքի ներկայացուցիչներ:

***

Սեպտեմբերի 20-ին Լոնդոնի Սբ. Եղիշե եկեղեցում տեղի ունեցավ հանդիսավոր երեկո՝ նվիրված Հայաստանի Հանրապետության անկախության 23-րդ տարեդարձին: Միջոցառումը կազմակերպել էր Բրիտանահայ համայնքային խորհուրդը՝ ՀՀ դեսպանության հովանու հերքո:

Ելույթ ունեցան Բրիտանահայ համայնքային խորհրդի ատենապետ Արա Փալամուդյանը եւ ՀՀ դեսպանության խորհրդական Արա Մարգարյանը, ով ընթերցեց դեսպան Արմեն Սարգսյանի ողջյունի խոսքը՝ ուղղված հանդիսության մասնակիցներին:

Այնուհետեւ կայացավ համերգ, որին հրավիրված էր հայտնի երգչուհի Ալլա Լեւոնյանը: Ելույթ ունեցավ նաեւ համայնքային «Աղթամար» պարի համույթը:

Երեկոյին մասնակցում էին հայ համայնքի ներկայացուցիչներ, համայնքային կազմակերպությունների ղեկավարներ եւ այլ հյուրեր:

ՀՀ արտաքին գործերի նախարարություն