Գրականագետ Դավիթ Գասպարյանը և Երևանի գրողների միության նախագահ Աբգար Ափինյանը համարում են, որ նախկին վարչապետը շատ վատ է աշխատել: Այս մասին նրանք հայտարարեցին այսօր՝ լրագրողների հետ հանդիպման ժամանակ:

Դավիթ Գասպարյանը նշեց, որ կարելի է հանգիստ ընդունել Տիգրան Սարգսյանի հրաժարականը:

«Ես Տիգրան Սարգսյանին գնահատում եմ նվազագույնս: Նա, բարեկիրթ մարդ լինելով, ոչ մի բարեփոխում չարեց: Պարզ խնդիրներ կան,որ մինչև այսօր իրենց լուծումը չեն ստացել. 20 տարի է Դվին հյուրանոցը անտեր վիճակում է գտնվում, Սասունցի Դավթի հարևանությամբ Կինոյի շենքը քանդած է և նման շատ կառույցներ կան, որոնք ավերակ են: Ոչ ոք չի զբաղվում այս խնդիրներով:Մենք չունենք տնտեսական աճ»,-նկատեց գրականագետը:

Նա համոզված է, որ եթե լինի տնտեսական աճ, մնացած բոլոր օղակներն էլ կգործեն:

Դավիթ Գասպարյանի կարծիքով, Երևանն ամենևին էլ մշակութային մայրաքաղաք չէ:

Նա, անդրադառնալով նաև վերջերս Կրեմլում տեղի ունեցած մրցանակաբաշխությանը, այն համարեց ամոթալի երևույթ մեր մշակույթի մեջ:

«Մարդիկ թատրոններ չեն հաճախում,ապականված գրքեր են տպագրվում: Սա մեր մշակույթի մահն է»,-համոզված է Դավիթ Գասպարյանը:

Իսկ «Հայկական Վարկածի» այն հարցին, թե արդյո՞ք պետությունն է մեղավոր այդ հարցում, թե՞ պարզապես հասարակության պահանջն է, գրականագետը պատասխանեց.

«Ոչ թե ընթերցողն է հեռացել գրականությունից, այլ գրականությունն է հեռացել ընթերցողից: Ընթերցողը ցանկություն ունի կարդալու, բայց որակ չկա ո՛չ գրքերում և ո՛չ էլ թատրոններում կամ կինոներում»:

Դավիթ Գասպարյանը նշեց, որ ամեն բան նախ և առաջ ղեկավարությունից է գալիս. «Ճիշտ է, վարչապետի աշխատանքը կարելի է գնահատել 0, չգիտեմ ձեռքերն էր կապած,թե ոտքերը,բայց մենք չպետք է ամեն ինչ «կոտրենք» նրա գլխին, իհարկե, ղեկավարությունից էլ է շատ բան կախված»:

Աբգար Ափինյանն իր հերթին նշեց այն կարևոր կետերը, որոնց վրա պետք է ուշադրություն դարձնի կառավարությունը.

«Նոր կառավաությունը և վարչապետը պետք է կարողանան ապահովել`

1. տնտեսական աճ

2. կասեցնեն արտագաղթը

3. կառավարության գործունեությունը չպետք է առաջացնի հասարակական դժգոհություն»:

Նրա համոզմամբ` բոլոր նախարարները պետք է լինեն տվյալ ոլորտի մասնագետները:

«Կադրերի խնդիրը առաջնահերթ խնդիր է, կադրն է որ պետք է փոխի համակարգը:Կառավարության կազմում բանիմաց մարդիկ պետք է աշխատեն»,-ասաց Երևանի գրողների միության նախագահը:

Աբգար Ափինյանը հավանություն տվեց Հովիկ Աբրահամյանի թեկնածությանը` նրանից ակնկալելով բարեփոխումներ:

Բանախոսները հույս հայտնեցին, որ նոր վարչապետը ուշադրություն կդարձնի այս բոլոր խնդիրներին:

Մարիանա Պետրոսյան