Մինչև 2015թ.-ը կասեցվել է Կառավարությանավելի վաղ ընդունած որոշումը, համաձայն որի` ՀՀ-ում հաշվառված բոլոր մեքենաները պետք է ապահովագրվեն:

«Տարիներ առաջ մարդիկ իրենց մեքենաները վաճառել են և իրավական ամբողջ գործընթացը չեն իրականացրել: Օրենքի ընդունումից հետո, հարյուրավոր մարդիկ վարչական պատասխանատվության սկսեցին ենթարկվել: Մարդիկ վաճառել էին մեքենա և հաշվառման հետ կապված հարցերը չէին լուծել: Այսօր մարդիկ մոռացել են՝ ում են վաճառել, որ նոտարական գրասենյակում գործարք իրականացրել, մեքենաների տերերը չգիտեն՝ ինչպես գտնել սեփականատիրոջը, մի մասը մաս-մաս վաճառված էր»,- այսօր ՀՀ կառավարության նիստից հետո, ասաց արդարադատության նախարար Հրայր Թովմասյանը:

Խոսքը վերաբերվում է այն տրանսպորտային միջոցներին, որոնք վաճառվել են առանց սեփականատիրոջ փոփոխության գրանցման ընթացակարգերի, և որոնց տերերը, դրանք վաճառած լինելով տարիներ առաջ, այժմ ստանում են ապահովագրության տուգանքների մասին ծանուցումներ։

«Խնդիրը մինչև տարվա վերջ 99%-ով կլուծվի: Ասում եմ 99%, որովհետև հնարավոր է լինեն ավելի դժվար լուծվող դեպքեր, երբ մարդը մահացել է և այլն»,- ասաց Թովմասյանը` խոսատանալով, որ Ոստիկանությունն ու Արդարադատության նախարարությունը կօգնեն դուրս գալ ստեղծված իրավիճակից, կաջակցեն քաղաքացիներին` փնտրել գտնելու վաճառված մեքենաները:

Հարցին, թե՝ մինչ օրենքի կասեցումը, սահմանված տուգանքների համար գանձումներ եղե՞լ են, նախարարն ասաց. «Վստահ չեմ կարող ասել, բայց կարծեմ՝ գանձումներ չեն եղել: Իսկ եթե եղել են, կարող են դիմել Ոստիկանություն, պետք է դրանք հետ վերադարձվեն»։