Եթէ կարենանք ԱԶԱՏ ՄԻՏՔՈՎ մտածել, յայնժամ կը նուաճենք մեր ԱԶԱՏՈՒԹԻՒՆԸ….քանզի անազատ միտքով երբեք կարելի չէ ազատ ըլլալ էապէս: Սա պիտի նշանակէր միտքը ԱԶԱՏԱԳՐԵԼ շերտ-շերտ կուտակուած թապուներէն, կարծրատիպերէն, քարացած կաղապարներէն, որոնք իրենց կապարէ ճնշումին տակ կը պահեն ՄԻՏՔԸ…: Բայց մարդկային ընկերութիւնը պիտի ուզէ՞ր էապէս ԱԶԱՏ ըլլալ…: Ժամանակին, դարեր առաջ, ՍՈԿՐԱՏԵՍԸ մահուան դատապարտուեցաւ՝ մատղաշ սերունդին ազատ մտածել սորվեցնելուն համար. մեր մէջ ալ, ազատ ՄՏԱՒՈՐԱԿԱՆՆԵՐԸ ուղղակի թէ անուղղակի կը հալածուին իշխանութեանց կողմէ….: Բոլոր իշխանութիւններն ալ, այս կամ այն կերպով կը միտին իրենց ՀԱԿԱԿՇՌԻՆ տակ պահելու մարդկային ԳԻՏԱԿՑՈՒԹԻՒՆԸ, որպէսզի կարենան զայն ՁԵՌՆԱՎԱՐԵԼ ըստ իրենց կամայականութիւններուն….

***

Ի՛նչ անակնկալներով է յղի կեանքն առհասարակ….Իւրաքանչիւր օր նոր սկիզբ մըն է կարծէք, որ նոյնքան անկանխատեսելի է, որքան խոհերը որոնք մեզի կ’այցելեն տիեզերքի չորս ծագէն, պահ մը նոր փայլատակումով լուսաւորելով մեր մտաւոր աշխարհը….Կը թուի թէ սահման չունի մարդկային միտքը, իմացութիւնը, պայմանով որ սակայն ան մնայ խոնարհօրէն բաց՝ ընկալելու կեանքի ամէնէն պարզ ճշմարտութիւններէն մինչեւ բարդագոյն իրականութիւնները, անկաշկանդ ու անարգել՝ մտքի պատուարներէն, որոնք կանխակալ կարծիքի, նախապաշարումներու եւ այլ մտակաղապարներու ետին թաքնուած, կը խափանեն մտքի ԱԶԱՏ ԹՌԻՉՔԸ….

Երան Գույումջյանի ֆեյսբուքյան էջից