ՀՀ ոստիկանությունը Հայաստանում Ինտերպոլի ազգային կենտրոնական բյուրոյի օգնությամբ` համագործակցելով Վրաստանի իրավապահների հետ, հունվարի 31-ին Թբիլիսիում հայտնաբերել և բռնել է oֆշորային սկանդալում ներգրավված, գործարար Աշոտ Սուքիասյանին:

Ինչպես հայտնում են Ոստիկանությունից, այժմ քննարկվում է Աշոտ Սուքիասյանի էքստարդիցիային ենթարկելու հարցը:

Հիշեցնենք, որ Աշոտ Սուքիասյանը նամակ էր ուղարկել ՀՀ գլխավոր դատախազ Աղվան Հովսեփյանին, իսկ պատճենը՝ «Հետքին»: Նամակում մասնավորապես ասվում էր. «Ուզում եմ անդրադառնալ օֆշորային կազմակերպությանը` WLISPERA HOLDINGS LIMITED-ին: Նախ ասեմ, որ այս կազմակերպության հիմնադիրը ես եմ և ես եմ բաժնեմասեր գրել Տ. Սարգսյանի և Ն. Կճոյանի անուններով` առանց նրանց գիտության և առանց նրանց համաձայնության: Դա արել եմ, որպեսզի իմ բիզնեսը զերծ պահեմ տարբեր ոտնձգություններից: Չեմ գիտակցել, որ այն կարող է հետևանքներ ունենալ»:

Աշոտ Սուքիասյանին մեղադրանք է առաջադրված առանձնապես խոշոր չափերով խարդախության (ՀՀ Քր.օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) և հանցավոր ճանապարհով ստացված առանձնապես խոշոր չափերով եկամուտներն օրինականացնելու (190-րդ հոդ. 3-րդ մասի 1-ին կետ) համար: Խափանման միջոց է ընտրվել կալանավորումը, հայտարարվել էր հետախուզում: