Հարուստ և պաշտոնավոր «պապայի բալաներն» այսօր հատկապես վտանգավոր են դարձել հանրության համար: Թմրանյութերի շրջանառություն և օգտագործում, փոխհրաձգություններ, ծեծ, խուլիգանություն, զինված ռազբորկաներ. ահա հանցագործությունների ցանկը, որոնց մեջ թաթախվում են «դեմքերի»՝ փոքրուց փող, զենք, թիկնապահ տեսած ժառանգները: Նրանց անունները երբեք այսքան հաճախ չեն նշվել օպերատիվ ամփոփագրերում, և հանրությունն էլ այսքան քինախնդիր չի հետևել նրանց ճակատագրին, քանի որ գիտի՝ պաշտոնյաների որդիներին իրավապահները հովանավորում են, «սղղացնելով» նրանց անունները գործի նյութերից, մեղմ պատիժներ սահմանելով կամ ժամկետից շուտ բերդից «հանելով»: Արդյունքում ստացվում է, որ սկզբում որդիներն են հայրերի շնորհիվ «փառավորվում», հետո էլ հայրերը՝ որդիների կատարած հանցագործություններով:

ՏՂԱՍ ՊԵՏՔ Է «ՊՈՐՇ» ՔՇԻ

Ինչո՞ւ պետք է քաղաքապետարանի միջին պաշտոնյա, շատ վատ աշխատող տրանսպորտի վարչության պետ Հենրիկ Նավասարդյանի որդին՝ Դավիթ Նավասարդյանը, 27 տարեկանում «Պորշ Կայեն» մակնիշի ավտոմեքենա վարի, որի շուկայական արժեքը 45-50 հազար դոլար է, և դեռ տարատեսակ պատմությունների մեջ ընկնի՝ ակտիվիստների վրա հարձակվի և հայհոյի նրանց, թմրամիջոցն ու զենքը մեքենայի մեջ՝ պտտվի Երևանով, կռիվների մեջ ընկնի,  ինչպես եղավ տոներից հետո՝ հունվարի 11-ին, «Գնունու շուկայի» դիմաց: Ինչպես հայտնի է, այդ օրը Դավիթ Նավասարդյանն իր մեքենայի մյուս երեք երիտասարդ ուղևորների հետ բերման ենթարկվեց ոմն Անդրանիկ Ս.-ի հետ ձեռնամարտի համար: Ոստիկանության տվյալներով, 20 սմ երկարությամբ և 9 սմ-անոց շեղբով դանակը, որի մեջ թմրադեղ կար, հենց Դավիթի մեքենայից են հանել, բայց պաշտոնապես շեշտվեց, որ տուժողը և վնասվածքներ ստացողը Նավասարդյանի որդին է: Փորձաքննության արդյունքները դեռ չկան, հետաքննությունն ավարտված չէ, բայց ոստիկանությունն արդեն պաշտպանում է Նավասարդյանի որդուն:

 ՔԱՆԻ ԴԵՌ ԿԱ ՊԱՊԱՆ…

«Ինչո՞ւ պաշտոնյայի որդուն չեն կալանավորել: Նա կռիվ է արել, թմրամիջոց ուներ մոտը և դանակ»,- մեր հարցին ոստիկանության մամուլի պատասխանատու Արմեն Մալխասյանը պատասխանեց, որ այդպես կվարվեին ցանկացած քաղաքացու դեպքում. «Նրա մոտ 0,01 գրամ թմրամիջոց հիշեցնող նյութ է հայտնաբերել, որի ապօրինի շրջանառության համար ընդամենը 200 հազար դրամ տուգանք է սահմանված, իսկ այդ դանակը կարելի է զենք համարել, թե ոչ, ցույց կտա փորձաքննությունը»: Գուցե վաղ է եզրակացություններ անելը, սակայն հիշենք, որ ամռանն էլ ակտիվիստների դեմ բռնություն կատարելու և հայհոյելու համար Դավիթ Նավասարդյանին չպատժեցին: Ո՞վ է Հենրիկ Նավասարդյանը, որի՝ աշխատանքից ազատման համար ակտիվիստները պայքարեցին ամիսներ շարունակ, բայց այդպես էլ հաջողության չհասան, այն դեպքում, երբ Երևանում տրանսպորտի վիճակն իրոք խայտառակ է: Քաղաքապետարանի աշխատակիցների շրջանում վարկած է պտտվում, որ բացի գծատեր, տարիներ շարունակ լավ փող աշխատած և իր գործի պրոֆեսիոնալը լինելուց (պրոֆեսիոնալիզմ, որը չի անդրադառնում քաղաքային տրանսպորտի վիճակի վրա՝ Ս. Ս.) Նավասարդյանը հայտնի է նրանով, որ քաղաքապետ Տարոն Մարգարյանի առաջ բացել է քաղաքապետարանի աշխատանքի ֆինանսական գաղտնիքները, այն, ինչ պիտի իմանար քաղաքապետը, որ կարողանար «աշխատել»: Այնպես որ, ասում են՝ նա ավելի անձեռնմխելի է, քան նույնիսկ Տարոնը:

ԱՆՁԵՌՆՄԽԵԼԻՆԵՐԻ ՈՐԴԻՆԵՐԸ ՆՈՒՅՆՊԵՍ ԱՆՁԵՌՆՄԽԵԼԻ ԵՆ

Հատկապես, երբ սեփական ամրոցն են պաշտպանում հարձակումներից: Խոսքը, իհարկե, Լիսկայի որդու՝ Տիգրան Խաչատրյանի մասին է, որին 2013 թվականի հունիսի 1-ին տեղի ունեցած կրակոցների հետևանքով զոհված, Գորիս քաղաքի բնակիչ Ավետիք Բուդաղյանի գործով մեղադրում էին միաժամանակ երեք հոդվածներով՝ սպանության, դիտավորությամբ առողջությանը ծանր վնաս պատճառելու և ապօրինի զենք-զինամթերք կրելու, սակայն հետագայում նրա նկատմամբ քրեական հետապնդումը դադարեցվեց: Մինչ տուժողի իրավահաջորդի ներկայացուցիչ Հայկ Ալումյանը դատարանում բողոքարկում է այս որոշումը,  արյունալի դեպքերում թաթախված երիտասարդը հանգիստ հեռանում է երկրից և Ամանորը հոր՝ Լիսկայի հետ անցկացնում Ֆրանսիայում, ինչը ՀՀ ոչ պապայի բալա քաղաքացին նույն հանգամանքներում միայն երազում կտեսներ, իր բանտախցում փակված: Պապայի բալիկների ցանկը կարելի է շարունակել: Երբեմն նրանց հետ զավեշտալի իրադարձություններ են կատարվում: Օրինակ, դատապարտյալները պատմում էին, որ Գյումրիի նախկին քաղաքապետ Վարդան Ղուկասյանի որդին՝ բազմաթիվ քրեական պատմությունների հերոս Սպարտակ Ղուկասյանը, երբ  բանտարկված էր «Արթիկ» քրեակատարողականում, մյուս դատապարտյալների հետ թղթախաղ էր խաղում հոր գումարների վրա: Հետագայում նրա անունը շրջանառվեց Վարդան Ղուկասյանի փեսայի՝ Կարեն Եսայանի սպանության գործով: Սպանվածի մայրը, որը դատարանում բարձրաձայնել էր վարկածը, թե Կարեն Եսայանին սպանողը Սպարտակ Ղուկասյանն է, հետապնդման ենթարկվեց զրպարտության գործով, որն այժմ դեռ շարունակվում է:

ԿԱԼԱՆԱՎՈՐԵՔ ՈՐԴՈՒՍ

Ինչպես են վերաբերվում հայրերը որդիների քաջագործություններին՝ այս թեման փակ է: Այս մասին հայրերը չեն սիրում խոսել: Որդին Հայաստանում սրբություն է, ամրոցի պես: Հենրիկ Նավասարդյանը, որը մինչև վերջերս հասանելի էր մամուլի համար, որդու՝ Դավիթի հետ կատարվածից հետո, հունվարի 11-ից անհասանելի է դարձել, վստահելով իր բջջայինը վարորդին: Հայտնի է, թերևս, սպորտի նախարար Յուրի Վարդանյանի վերաբերմունքը:  Նրա որդին՝ Դավիթը, ինչպես հայտնի է, մեղադրվում է թմրամիջոցների ապօրինի շրջանառության մեջ: Անցյալ տարվա հոկտեմբերին նա բերման էր ենթարկվել հայ-իրանական սահմանից, և ոստիկանները նրա մոտ հայտնաբերել էին 99 գրամ հաշիշ: Հայրը, սակայն, չի միջամտել քննությանը: Նա նույնիսկ մինչ օրս որդուն տեսակցելու չի գնացել և սկզբում անգամ փաստաբանի գումար չտրամադրեց: Դավիթը կալանավորվելուց անմիջապես հետո հայտարարեց, որ փաստաբան չի վարձում, քանի որ փող չունի: Հետո փաստաբան հայտնվեց՝ Վահան Հայրապետյանը, սակայն նախարարը, որը Դավիթի գլխավոր պաշտպանը պետք է լիներ, ոչ միայն չօգնեց նրան, այլև, ինչպես վստահեցնում են նրա ընկերական շրջապատի մարդիկ, ամեն ինչ արեց, որպեսզի տղային կալանավորեն: Օրերս քննչական մարմինը ևս երկու ամսով երկարաձգել է Դավիթ Վարդանյանի կալանքի ժամկետը:

Սյուզան Սիմոնյան