Ռուսական վճարային МИР համակարգի քարտերը 2024 թ. մարտի 30-ից Հայաստանի բանկերի մեծ մասի բանկոմատները և վճարային տերմինալները դադարել են սպասարկել` բացառությամբ ՎՏԲ-Հայաստան բանկի, որը համարվում է ռուսական ՎՏԲ բանկի ենթակառուցվածքը: Այս մասին Yerkir.am-ին հայտնեց քաղաքագետ, ՌԴ ՈՒՊՆՏՀ միջազգային հարաբերությունների ֆակուլտետի հանրային կառավարման մագիստրոս Աղվան Պողոսյանը:

Ըստ քաղաքագետի՝ ԱՊՀ երկրներ Ղրղզստանի և Ղազախստանի բանկերը նույնպես դադարեցրել են իրենց երկրներում МИР քարտերով գործարքները:

«Վախենալով պատժամիջոցներից՝ ԱՊՀ շատ երկրներ, մասնավորապես Հայաստանը, Ղրղզստանն ու Ղազախստանը գործում են նույն սցենարով, ինչի արդյունքում այդ երկրներում բանկային հատվածն առավելապես հրաժարվում է МИР բանկային քարտերի ընդունումից»,- նշեց նա:

Հարցին՝ ինչո՞ւ է ռուսական համակարգից հրաժարվելն անցանկալի Հայաստանի տնտեսության համար, քաղաքագետը հավելեց. «Ռուսաստանի տարածքում աշխատանքային գործունեություն է իրականացնում մոտ 2-2, 5 մլն ՀՀ քաղաքացի։ Նրանցից շատերը սեզոնային աշխատանք են կատարում (խոպանչիներ) Ռուսաստանում՝ Հայաստանում ունենալով տներ և ընտանիքներ։ Տպավորություն է, որ իշխանություններն ամեն գնով փորձում են բարդացնել արտագնա աշխատանքի մեկնող մեր հայրենակիցների վիճակը (խոսքը նաև խոպանչիներին հարկման մասին է)՝ այլընտրանքային մեխանիզմներ չառաջարկելով»։

Ըստ Պողոսյանի՝ այս ամենը տեղավորվում է իշխանությունների վարած հակառուսական քաղաքականության համատեքստում, որի արդյունքում տուժում է ՀՀ շարքային քաղաքացին:

«Հարկ է նշել նաև, թե որքան է Ռուսաստանի մասնաբաժինը Հայաստանի տնտեսության մեջ։ Ըստ Էկոնոմիկայի նախարարության հաշվետվության` Հայաստանից Ռուսաստան արտահանումը մի քանի տարվա ընթացքում եռապատկվել է։ 2023 թ.-ի առաջին կիսամյակի արդյունքներով երկրների միջև ապրանքաշրջանառությունը հասել է 7,6 միլիարդ դոլարի։ Ներկայումս այդ թվերը աճի միտում ունեն։ «Միր» քարտերով` Արևմուտքի նախաձեռնությունն առաջին հերթին կապված է հետխորհրդային տարածքում իրավիճակը ցնցելու ցանկության հետ՝ դրանով իսկ զգալիորեն շեղելով Ռուսաստանին Ուկրաինայի հետ հակամարտությունից»,- ասաց քաղաքագետը։

Աղվան Պողոսյանի հավաստմամբ՝ այս ամենը նրա համար է, որ Արևմուտքը Ռուսաստանի հետ իր հռետորաբանությունը վարի ավելի շահավետ պայմաններով։ Ըստ նրա՝ այս համատեսքսում  ավելորդ է խոսել այն մասին, թե այս ամենն ինչ ազդեցություն կունենա մեր տնտեսության վրա։