Սոցցանցերի հայկական օգտատերերի վրա ակտիվացած տեղեկատվական գրոհները, սնկի պես աճող կեղծ օգտահաշիվներն ու ադրբեջանական պաշտոնական աղբյուրներից եկող ապատեղեկատվության հոսքերը վկայում են, որ Ադրբեջանը հերթական էսկալացիային է պատրաստվում,նման տեսակետ է հայտնել ադրբեջանագետ, պատմական գիտությունների թեկնածու Տաթևիկ Հայրապետյանը՝ ամենօրյա ռեժիմով մոնիթորինգ անելով սոցկայքերն ու թշնամական լրատվադաշտը։

Արցախի շրջափակման արդյունքում, որը երեք ամսից ավելի է՝ տևում է, Ադրբեջանն իր առջև դրած դրած նպատակներից միայն մեկին է հասել՝ Արցախի քաղաքական դաշտից Ռուբեն Վարդանյանի հեռացմանը։ Հիմա փորձում է ներսից քանդել հասարակությանը՝ կեղծ հաղորդագրությունների, քարոզչական նյութերի միջոցով խուճապ ու միմյանց նկատմամբ անվստահություն սերմանելով մարդկանց մեջ։

«Կեղծ պրոֆիլներից կարող են նամակներ ուղարկել՝ սկզբում փորձելով շոշափել մադրկանց տրամադրությունները, որոշակի տեղեկությունների տիրապետելուց հետո՝ շանտաժի սպառնալիքով ստիպել իրենց անհրաժեշտ ինֆորմացիան տրամադրել։ Նաև տելեգրամյան բազմաթիվ կեղծ, կասկածելի ալիքներ են հայտնվել վերջին շրջանում, որոնցով Ադրբեջանն իր թեզերն է տարածում»,-«Փաստինֆո»-ի հետ զրույցում ասում է ադրբեջանագետը։

Հայրապետյանը շեշտում է՝ թշնամին իր քարոզչական նյութերը տարածում է հիմնականում երեկոյան ժամերին, երբ մարդիկ հանգստանում են, ավելի շատ ժամանակ են անցկացնում սոցցանցերում։ Մյուս կողմից, ըստ մասնագետի, հասարակության վրա հոգեբանական ազդեցությունն է ուժեղացնում՝ խուճապային հաղորդագրություններով անկարողության զգացողություն ներարկելով հասարակության մեջ։

Խուճապից խուսափելու, թշնամական քարոզչությանն արդյունավետ դիմագրավելու ամենողջամիտ տարբերակը, Հայրապետյանը համոզմամբ, պատրաստված լինելն է։ Ադրբեջանագետն ընդգծում է՝ եթե քաղպաշտպանական կառույցները նորմալ վիճակում լինեն , հասարակությունն էլ տեղեկացված, թե որ իրավիճակում ինչ պետք է անի, ապա ցանկացած պարագայում թշնամուն կդիմագրավի կազմակերպված ձևով ու առանց խուճապի։