Հայաստանի ներկա իշխանությունների օրոք զարմանալի չէ, որ ռուսական կողմը կամ ՀՀ-ի հետ առնչվող որևէ կողմ կարող է մի բան հայտարարել կամ ստորագրել, բայց մեկ այլ բան անել։ Գրեթե վստահ եմ, որ Փաշինյանի և Ալիևի միջև եղել է ներքին պայմանավորվածություն, թե երբ է հանձնվելու «Լաչինի միջանցքը»։ Անդրադառնալով անհասկանալի շտապողականությամբ և նոյեմբերի 9-ի համաձայնագրի կոպիտ խախտմամբ «Լաչին միջանցք»-ը թշնամուն հանձնելու գործընթացին՝ «Փաստինֆո»-ի հետ զրույցում նման տեսակետ հնչեցրեց քաղաքագետ Լևոն Մնացականյանը։

«Երբ 2020թ․ նոյեմբերի 9-ից հետո ՀՀ-ում իշխանությունը չփոխվեց, մենք ավելի վատ վիճակում հայտնվեցինք։ Թե Ռուսաստանը, թե՛ Իրանը Հայաստանի հետ հիմա վարվում են այնպես, ինչպես ցանկանում են, այսինքն՝ մեր կարծիքն ընդհանրապես հաշվի չի առնվում։ Թե ինչ կպայմանավորվեն Փաշինյանն ու Ալիևը, մեծ հաշվով, Ռուսաստանին այդքան էլ հետաքրքիր չէ։ Ռուսաստանը փորձում է տարածաշրջանում ամրապնդել իր դիրքերը, և ներկա դրությամբ ռուս-ադրբեջանական շահերն ավելի են համընկում, քան ռուս-հայկականը։ Ռուսաստանը մեր հաշվին խաղում է Ադրբեջանի հետ՝ հետագայում այդ երկրում իր ազդեցությունն ընդլայնելու համար։ Եթե տեսնի, որ չի ստացվում Ադրբեջանին պոկել Արևմուտքից, ապա կթեքվի մեր կողմը»,-նշեց քաղաքագետը։

Մնացականյանի համոզմամբ՝ ՀՀ ներկա վարչախմբից սպասել, որ ինչ-որ հարցում կհակադրվի Ալիևին, անհույս է և նոյեմբերի 9-ի եռակողմ համաձայնագրի կետերի ակնհայտ խախտումները հենց դրա մասին են վկայում։

«Սրա միակ լուծումը վարչապետի պաշտոնից Փաշինյանի հեռացումն է։ Փաշինյանն ամեն դեպքում կհեռացվի, բայց՝ գործընթացի ավարտից հետո։ Ավելի շուտ դա հնարավոր կդառնա, եթե ընդդիմադիր դաշտը կոնսոլիդացվի։ Ընդդիմադիր բևերը շատ հակասություններ ունի․ պայքար է, թե ով է լինելու Նիկոլից հետո։ Այսինքն՝ ոչ միայն չեն կոնսոլիդացվում, այլև՝ խանգարում են միմյանց»,-նկատեց Լևոն Մնացականյանը։

Նշենք, որ ադրբեջական մեդիադաշտում տարածվել են նյութեր, այդ թվում՝ տեսահոլովակներ, որոնց համաձայն՝ սկսվել է «Լաչինի միջանցքում» տեղակայված խաղաղապահների անցակետերի ապամոնտաժումը, իսկ Բերձորի քաղաքապետ Նարեկ Ալեքսանյանը հերքել է՝ դա որակելով ապատեղեկատվություն։