Սահմանային լարվածություններ կան և դրանք ստեղծում է Ադրբեջանը: Այս մասին լրագրողների հետ ճեպազրույցում ասաց ՀՀ փոխվարչապետի պաշտոնակատար Տիգրան Ավինյանը՝ հավելելով, որ այլ տեղերում մեղավորներ փնտրելը շատ սխալ տեղ է տանում մեզ.

«Ադրբեջանական կողմն է հաճախակիորեն լարվածություններ ստեղծում սահմանին, շատ կարևոր է, որ մենք ինքներս հասկանանք սա, ընդունենք, ինչպես նաև համոզենք մեր միջազգային գործընկերներին»,- ասաց Ավինյանը և ավելացրեց.«Սահմանային լարվածություններին պետք է տալ սիմետրիկ պատասխաններ՝ հնարավորինս զսպված, բայց և հասկանալ, որ սահմանային անվտանգության պահպանումը մեր զինված ուժերի, սահմանապահ զորքերի պարտականությունն է»:

Անդրադառնալով հայ-ադրբեջանական սահմանին ստեղծված իրավիճակին՝Ավինյանն ասաց, որ անպայման սահմանագծում և սահմանազատում պետք է տեղի ունենան մեր բոլոր հարևանների հետ, միևնույն ժամանակ ընդգծեց, որ մեր սահմանը շատ կոպիտ խախտելը և մեր սահմանի ներսում տեղակայվելը, մեզ շանտաժի մեթոդներով փորձելը ինչ-ինչ գործողությունների մղելն անարդյունավետ ճանապարհ է և որևէ արդյունք չի կարող տալ.

« Նմանատիպ մոտեցումը, շանտաժի մեթոդը Հայաստանի Հանրապետության իշխանությունների և ժողովրդի համար չեն կարող ընդունելի լինել: Այո, անպայմանորեն պետք է նստել բանակցությունների սեղանին, բայց առաջին հարցը, որ պետք է քննարկվի, ադրբեջանական զորամիավորումների հեռացումն է Հայաստանի Հանրապետության սահմաններից»,-ասաց Ավինյանը

Իսկ թե ե՞րբ կսկսվեն դեմարկացիայի և դելիմիտացիայի աշխատանքները՝ Ավինյանը նշեց, այժմ առաջնահերթ է արհեստականորեն ստեղծված խնդիրները հանգուցալուծումը, որից հետո արդեն քննարկում կսկսվի ֆունդամենտալ հարցերի շուրջ: Նա նաև համոզմունք հայտնեց, որ այս հարցը դիվանագիտական լուծում կունենա: