Հայաստանի իշխանությանը նոյեմբերի 9-ից առաջ էլ արդեն հայտնի էր, որ Արցախում ընթացող ռազմական գործողություները հօգուտ հայկական կողմի չեն: Տեղեկությունը Sputnik Արմենիայի հետ հարցազրույցում հայտնեց ՀՀ ԱԺ փոխնախագահ Ալեն Սիմոնյանը:

«Երբ ես նոյեմբերի 5-ին մեկնում էի Մոսկվա, արդեն իսկ պարզ էր, որ ռազմական գործողությունները հօգուտ հայկական կողմի չեն, ու ես մեկնում էի հատուկ այդ նպատակով, որպեսզի ռուսաստանցի գործընկերների հետ քննարկենք մեր դաշնակցային հարաբերությունները, քննարկենք, թե ինչ քայլեր կարող ենք ձեռնարկել իրավիճակը լավացնելու ու պատերազմը արագ դադարեցնելու համար»,- ասաց Սիմոնյանը:

Ինչ վերաբերում է նոյեմբերի 9-ին ստորագրված եռակողմ հայտարարությանը, ապա Սիմոնյանը նշեց, որ դրա նախնական տարբերակի որոշ դրույթներին ինքը ծանոթացել է ՌԴ-ում ՀՀ դեսպանատանը: Իսկ արդեն ստորագրումից հետո հրապարակված տեքստը, նրա խոսքով, էապես տարբերվում էր իրեն ներկայացված տարբերակից:

«Հայտարարության առաջին տարբերակում հիշատակումներ կային անկլավների և այլնի մասին: Վերջնական տարբերակում, բարեբախտաբար, այդ ամենը բացակայում էր»,- ասաց Սիմոնյանը՝ հավելելով, որ հայտարարության փաստաթղթի ստորագրմանը նախորդած ժամանակահատվածում, մինչև վերջին պահը դրա բովանդակության շուրջ բանակցությունները շարունակվում էին ու այն փոփոխվում էր:

«Պարզ էր, որ պատերազմը հարկ է կանգնեցնել: Ընդ որում` դա պարզ էր ոչ միայն նոյեմբերի 5-ին այլև դրանից առաջ: Պարզ էր, որ հակառակորդը գրոհում է, ու մենք կորցնում ենք մեր դիրքերը»,- ասաց Սիմոնյանը:

 Ինչ վերաբերում է ՌԴ-ի հետ հարաբերություններին ու մասնավորապես Ռուսաստանի հետ միավորվելու մասին հնչող տեսակետներին, ՀՀ ԱԺ փոխնախագահը հայտարարեց, որ թե՛ նախկինում, թե՛ այսօր ՌԴ-ին համարում է տարածաշրջանում ու աշխարհում Հայաստանի գլխավոր դաշնակիցը, բայց ՌԴ-ի հետ միավորման որևէ տարբերակ, նրա խոսքով, ՀՀ ներկայիս իշխանության օրակարգում չի դիտարկվում: