Արտահերթ ընտրություններ անցկացնելու նպատակով խորհրդարանական և արտախորհրդարանական ուժերի հետ քննարկումներ անցկացնելու հրավերը գործող վարչապետի պահուստային տարբերակներից մեկն է։ Sputnik Արմենիայի հետ զրույցում նման կարծիք հայտնեց քաղտեխնոլոգ Վիգեն Հակոբյանը` մեկնաբանելով Նիկոլ Փաշինյանի այն գրառումը, որով կառավարության ղեկավարը երկխոսության է հրավիրում քաղաքական ուժերի ներկայացուցիչներին արտահերթ ընտրություններ կազմակերպելու համար։

«Սա Նիկոլ Փաշինյանի արսենալում եղած տարբերակներից մեկն էր, մի քանի տարբերակ էլ կար, այսինքն` կարող էր նաև միջանկյալ քայլի դիմել»,- ասաց նա։

Միջանկյալ քայլերից մեկն էլ, ըստ Հակոբյանի, ԱԺ խոսնակ Արարատ Միրզոյանին վարչապետ առաջադրելն էր։ Վերջին շրջանում լրատվամիջոցները գրում էին, թե չի բացառվոււմ, որ իշխող քաղաքական թիմը կարող է վարչապետի պաշտոնում սեփական թեկնածուին առաջադրել։ 

Թե ինչու վարչապետն, ի վերջո, այս տարբերակին հանգեց, դժվար է ասել, բայց մեկ բան ակնհայտ է`գործընթացները, որոնց ականատես ենք լինում և դեռ կլինենք ապագայում, միայն փողոցում կատարվող իրադարձությունների արդյունք չեն։  Եվ եթե արտահերթ ընտրություններն այնուամենայնիվ անցկացվեն, որոշ իրողությունների հետ ստիպված կլինեն հաշվի նստել։

«Կարծում եմ` այս անգամ հաշվի կառնեն ընտրողի վիճակը, հասարակության շրջանում դեգրադացման աստիճանը, կներեք իհարկե, բայց դա փաստ է, և 2018 թվականի իրադարձությունների դառը փորձը և արդյունքները, որին հիմա ականատես ենք լինում»,- նշեց Հակոբյանը։

Արտահերթ ընտրությունների գնալու դեպքում էլ, ըստ քաղտեխնոլոգի, երկրի ղեկավարի թիվ մեկ խնդիրը սեփական անձի, հարազատների ու քաղաքական թիմի անվտանգությունն ապահովելն է։ 

«Իր և իր մերձավորների անվտանգության երաշխիքները դեռևս անորոշ են, ներառյալ նաև ֆիզիկական անվտանգության խնդիրը, հաշվի առնելով` ինչ կոչեր են հնչում, ինչ տրամադրություններ կան թե՛ Հայաստանում, թե՛ սփյուռքում»,- ընդգծեց մասնագետը։ 

Հակոբյանը համոզված է՝ եթե Փաշինյանն ու նրա մերձավոր շրջապատն անվտանգության երաշխիքներ ունենային, ապա վարչապետի պաշտոնավարումը երկարաձգելու խնդիր չէր առաջանա, և Փաշինյաննն էլ կբռներ այն նույն ուղին, որով 1997-ին անցավ Հայաստանի առաջին նախագահ Լևոն Տեր-Պետրոսյանը։