Հայաստանի նախագահ Արմեն Սարգսյանը կարծում է, որ Լեռնային Ղարաբաղի հակամարտությունը պատահական չի հենց սեպտեմբերի վերջին սրվել: РБК հեռուստաալիքին տված հարցազրույցում նա ենթադրել է, որ պատերազմը Ադրբեջանի կողմից տարիներ շարունակ պատրաստվել է:

«Ինչո՞ւ այն սկսվեց սեպտեմբերին: Քանի որ Ամերիկան այդ ժամանակ զբաղված էր նախընտրական բանավեճերով: Քանի որ աշխարհում կորոնավիրուս կար, եւ բոլորը զբաղված էին, պայքարում էին առողջության ճակատում: Բացի այդ, այսօր դիտարկվում է Թուրքիայի հսկայական ազդեցությունը Ադրբեջանի վրա»,- ասել է Սարգսյանը:

ՀՀ նախագահի խոսքով՝ ներկայիս հակամարտությունը նախապատրաստվել է երկար տարիներ: «Ադրբեջանը միլիարդավոր դոլարներ է ծախսել սպառազինություն գնելու համար, իսկ Ղարաբաղում հայերն այդ ժամանակ գյուղեր, դպրոցներ, մանկապարտեզներ, հիվանդանոցներ են կառուցել: Թեեւ կան վերլուծաբաններ, ովքեր ասում են, որ անհրաժեշտ էր բունկերներ եւ ամրոցներ կառուցել: Բայց հայերը հավատում են միջազգային հարաբերություններին»,- հավելել է նա:

Սարգսյանը նաեւ չի համաձայնել այն կարծիքի հետ, որ գործոններից մեկը վարչապետ Նիկոլ Փաշինյանի իշխանության գալուց հետո Հայաստանում ազգայնական տրամադրությունների աճն է եղել: «Հայերը հայրենասեր են, ովքեր սիրում են իրենց հայրենիքը եւ հնարավոր ամեն ինչ անում են իրենց երկրի ապագայի համար: Ազգայնականությունը հայրենասիրության մուտացիա է, որը դուրս է գալիս առողջ բանականության սահմաններից: Դա Հայաստանում չկա», — ասել է նա:

ՀՀ նախագահը նաեւ կարծիք է հայտնել, որ ներկայիս հակամարտության արմատները գնում են 1920 թվական, երբ Լեռնային Ղարաբաղը տրվեց Ադրբեջանական ԽՍՀ-ին: «Ադրբեջանը բարձրացնում է տարածքային ամբողջականության հարցը: Ի՞նչ տարածքային ամբողջականություն: Այն, որ տվեց Խորհրդային Միությունը 70 տարի առա՞ջ»,- նշել է նա: «Խորհրդային Միության հիմնադիրները չէին մտածում մշակույթի, պատմության եւ կրոնի հետ կապված նրբությունների մասին: Այդ ամենը երկրորդական էր: Ոչ ոք ուշադրություն չէր դարձնում այն ցավոտ խնդիրներին, որոնք առկա էին ԽՍՀՄ ողջ տարածքում եւ դրսեւորվեցին փլուզումից հետո»,- ասել է Սարգսյանը: