Երեկ պատերազմ էր, այսօր պատերազմ է և ըստ ամենայնի՝ վաղն էլ շարունակելու ենք պատերազմի մեջ լինել: Ազգովի: Միայն թե այդ ազգովիի մեջ որքանո՞վ են տեղավորվում մեր կառավարության ներկայացուցիչները: Այս հարցն երեկ ավելի ցայտուն զգացվեց, երբ ԱԺ-ն քննարկում էր 2021 թվականի բյուջեի նախագիծը: Պարզվում է՝ կանխատեսումները, թե՝ հարկային մուտքերի նվազմամբ, ավելին՝ դե ֆակտո՝ պատերազմի և նրա հետոյական հետևանքների համապատկերում վերանայումներ կկատարվեն բյուջեի մեջ, այդպես էլ կանխատեսումների ոլորտում կարծող է մնալ: Քանի որ, ի հեճուկս այս ամենի՝ 2021թ-ի բյուջեի նախագծով պարգեւավճարների ֆոնդը պահպանվել է։

Հուսանք՝ քննարկումների արդյունքում բյուջեից այս տողը կհանվի, այլապես արդիական է դառնում տխրահռչակ ձևակերպումը՝ պատերազմը՝ պատերազմ, պարգևավճարը՝ պարևավճար:

Դե, իսկ կառավարության անդամի՝ ոչ մի կերպ չարդարացված հսկայական պարգևավճարից բարեգործություն անելու տարբերակը նույնքան անհասկանալի է, որքան մեր շատ օլիգարխների այն բարեգործությունները, որոնք մի կողմից՝ ժողովրդից խլվում էին, ասենք՝ հարկերից խուսափելու համատեքստում, մյուս կողմից՝ խլվածից մի պուճուր մաս վերադարձվում՝ բարեգործության անվան տակ:

Ընդ որում, այս դեպքում շատ ավելի անբարո ու տգեղ պատկեր ունենք, բյուջեի հաշվին բարեգործությունը ո՞րն է…

Ի դեպ, այս օրերի քրոնիկոնը մեզ երկու իրականություն է ցույց տալիս՝ ատամներով իրենց պարգևավճարները պահած պետական պաշտոնյաների, որոնք անհասկանալի է, թե ինչի համար են այն ստանում և անմնացորդ նվիրումով՝ ինքնակամ ու սիրով թիկունքում տարբեր աշխատանքների մեջ ներգրավված կամավորների, որոնց գործունեությունն է, որ ի շահ հայկական զույգ պետությունների է, ի նպաստ մեր սահմանները պահող զինվորների ու մեր հաղթանակի:

Հ.Գ. Հրապարակումը պատրաստ էր, երբ հայտնի դարձավ, որ Բյուջե 2021-ի նախագծով կառավարությունն առաջարկում է պարգևավճարների ֆոնդը պահել։ Նման հայտարարությամբ հանդես է եկել ՀՀ փոխվարչապետ Մհեր Գրիգորյանը։