Երևանի ընդհանուր իրավասության դատարանը բավարարել է «Բավրայի» մաքսակետի գործով տեսուչին կալանավորելու մասին միջնորդությունը՝ միևնույն ժամանակ մերժելով գրավ կիրառելու մասին պաշտպանների միջնորդությունը: Այս մասին «Փաստինֆո»-ին հայտնեց պաշտպան Վահան Հովհաննիսյանը՝ նշելով, որ դատարանի որոշումը սպասելի էր:

Փաստաբանի փոխանցմամբ` դատական նիստի մեկնարկին հայտարարել է, որ դատարանը գտնվում է անօրինական և ուղղակի ճնշման տակ: «Սպասում էինք այն, ինչ ստացանք: Այլ բան ենթադրելի էլ չէր»,- նշեց պաշտպանը` արձանագրելով, որ կառավարության նիստում վարչապետի հայտարարությունն ուղղակի ճնշում է դատարանների վրա, որը և կանխորոշելու է հետագայում մեղադրական վճիռի կայացումը՝ դատարանի կողմից:

Հարցին, թե արդյո՞ք պատրաստվում են բողոքարկել կալանավորելու մասին որոշումը, Հովհաննիսյանն ասաց, որ կբողոքարկեն և բոլոր ատյանները սպառելուց հետո կդիմեն Եվրոպական դատարան:

Ավելի վաղ տեղեկացրել ենք, որ նույն կասկածյալի մասնակցությամբ նախօրեին ԱԱԾ քննիչը քննչական գործողություն է կատարել՝ առանց պաշտպանների՝ խախտելով նրա պաշտպանական իրավունքները։ «Այն, ինչ մենք ենք տեսնում, կարծում եմ, իրավական բեսպրեդելի տիպիկ օրինակ է: Սա իրավական բեսպրեդել է»,- «Փաստինֆո»-ին ասել էր Հովհաննիսյանը:

Հիշեցնենք՝ կառավարության փետրվարի 6-ի նիստում վարչապետը հայտարարել էր, թե Բավրայի մաքսակետում անցած գիշեր բացահայտվել է մաքսանենգության խոշոր դեպք, որում ներգրավված են մաքսային ծառայության մի շարք աշխատողներ, ինչից որոշ ժամանակ անց ԱԱԾ-ն պաշտոնական հաղորդագրություն տարածեց, թե ՀՀ պետական եկամուտների կոմիտեի հյուսիսային մաքսատուն-վարչության իշխանության ներկայացուցչի գործառույթներ իրականացնող «Բավրա» մաքսակետի հերթափոխի պետը եւ մաքսային 2 տեսուչ, 2020 թ. հունվարի 25-ին ընդունելով բեռնափոխադրումներ իրականացնող կազմակերպության համասեփականատիրոջ առաջարկը, համաձայնության են եկել առանձնապես խոշոր չափի՝ 1.436.610 ՀՀ դրամին համարժեք 3000 ԱՄՆ դոլար կաշառք ստանալու դիմաց, առանց պատշաճ մաքսային հսկողության եւ ձեւակերպման մաքսային տարածքից բաց թողնել հիշյալ կազմակերպության կողմից Վրաստանից տեղափոխվող շուրջ 4.5 տոննա ընդհանուր քաշով բեռը: