Վերջին ժամանակներս շատացել են դեպքերը, երբ փաստերը փորձում են խեղաթյուրել եւ այնպես ներկայացնել, որ ժողովուրդը սկսի ծափահարել «ձեռքբերումներին»։ Այս մասին դեկտեմբերի 3-ին ՀՀ ԱԺ նիստում իր ելույթի ժամանակ ասաց «Լուսավոր Հայաստան» խմբակցության քարտուղար Գեւորգ Գորգիսյանը։

Նրա խոսքերով՝ կառավարությունը հաճախ է խոսում այն մասին, որ հարկերը կնվազեն, եւ դրա շնորհիվ կբարձրանան քաղաքացիների աշխատավարձերն ու եկամուտները։ «Սակայն նրանք մշտապես մոռանում են հիշատակել մի մանրուք, իսկ, ինչպես մենք գիտենք, «սատանան մանրուքների մեջ է թաքնված»։ Եւ այս նույն մանրուքն է հանդիսանում կուտակային թոշակի համակարգը, որի փոփոխությունները կսկսեն գործել արդեն հաջորդ տարվանից։

Օրինակ, եթե միջին աշխատավարձը երկրում կազմում է 178 000 դրամ, իսկ դա վիճակագրական կոմիտեի տվյալն է, ապա մինչեւ 2023թ․ այդ քաղաքացիների աշխատավարձերը կբարձրանան միայն 1000 դրամով։ Միջին աշխատավարձի աճը նույն 2023թ․, որը ես հանել եմ մեր աշխատավարձից, կկազմի 10 000 դրամ, երբ եկամտահարկը կնվազի մինչեւ 20 տոկոս։ Դրանից կշահեն թերեւս նրանք, ովքեր ստանում են 1 միլիոն դրամից ավել, եւ այն էլ՝ ոչ այդքան շատ։

Հետեւաբար, հայտարարություններն այն մասին, որ քաղաքացիների աշխատավարձերը կբարձրանան եկամտահարկի տոկոսդրույքների նվազման հաշվին, առասպել է, քանի որ ուժի մեջ կմտնեն կուտակային թոշակի համակարգի փոփոխությունները։ Դրան կավելանա նաեւ ինֆլյացիան, որի մասին մեզ, չգիտես ինչու, մոռանում են հիշեցնել։ Այն հիմնականում պայմանավորված է ալկոհոլային խմիչքների, բենզինի, դիզելային վառելիքի, բնական գազի եւ ծխախոտի ակցիզային հարկի սանդղակի բարձրացմամբ։ 2020թ․, ԵՏՄ պայմանագրի հետ կապված, կաճեն նաեւ որոշ սննդամթերքների գները, ինչպիսին են՝ միսը, կարագը, դեղամիջոցները, հացահատիկը։ Եւ այս ամենի ֆոնին առաջարկվում է ներդնել բնակչության ապահովագրման ընդհանուր համակարգ, ինչը կհանգեցնի հարկերի եւս 60 տոկոսով բարձրացման»,- պարզաբանեց Գորգիսյանը։

Ընդ որում, ինչպես նշեց պատգամավորը, դա որեւէ կերպ չի կարելի անվանել ապահովագրություն, որպես այդպիսին, քանի որ տվյալ դեպքում կստեղծվի պետական հիմնադրամ, որը փաստորեն զրկված կլինի որեւէ վերահսկողությունից, կհայտնվի մենաշնորհային վիճակում։ Գորգիսյանը չբացառեց նաեւ տարատեսակ կոռուպցիոն սխեմաների առաջացման հնարավորությունը։