Եվրոպայի խորհրդի դիմաց ընդդեմ Ստամբուլյան կոնվենցիայի բողոքի ակցիային միացավ նաեւ ՎԵՏՕ շարժումը։

Հիշեցնենք, որ այսօր առավոտից Ազգային ժողովի դիմաց «Կամք» ՀԿ-ի ներկայացուցիչները բողոքի ակցիա էին իրականացնում՝ ընդդեմ Ստամբուլյան կոնվենցիայի վավերացման։ Այնուհետեւ ակցիան շարունակել են քայլերթով՝ դեպի ԵԽ։

ՎԵՏՕ-ի ղեկավար Նարեկ Մալյանը հայտարարեց, որ մի շարք կազմակերպությունների շնորհիվ կանխվեց Ստամբուլյան կոնվենցիայի օգտին քարոզչությունը։
«Մենք բացահայտեցինք, որ կոնվենցիայի քարոզը հիմնված է ստի, կեղծիքի, մանիպուլյացիայի վրա, իսկ կոնվենցիայի քարոզով հիմնականում զբաղվում են տխրահռչակ Սորոսի գրասենյակի շահառուները, այսպես ասած Սորոսի վաստակները»,-ասաց Մալյանը։

Նրա խոսքով, իրականում Ստամբուլյան կոնվենցիայի նախնական քարոզչական փուլը ոչ միայն սուտ ու կեղծիք էր, այլև ծաղր՝ բռնության իրական զոհերի նկատմամբ։

«Կոնվենցիայի վավերացմամբ ՀՀ-ի օրենսդրության մեջ առաջին անգամ ամրագրվում է զուգընկեր եզրույթը փոխարինելով ամուսիններ եզրույթին, այսինքն տրանսվիստիտներն ընկնում են այս կոնվենցիայի պաշտպանության տակ որպես զուգընկերներ։ Կենսաբանական սեռ հասկացությունը կոնվենցիայում փոխարինվում է սոցիալական սեռ հասկացությամբ»,-ասաց ՎԵՏՕ-ի ղեկավարը։

«Քաղաքացիական գիտակցություն» ՀԿ նախագահ Նարեկ Սամսոնյանն էլ հայտարարեց, որ բոլորին է հայտնի՝ Ստամբուլյան կոնվենցիան ՀՀ-ի «վզին» փաթաթվում է այլ պատճառներով և իշխանությունները կոնվենցիային կողմ են այլ պատճառներով։

«Ասում են, իբր, ԵԽԽՎ-ն պահանջել է, որ գաղտնի հանդիպում լինի, չհրապարակվի այն։ Չեմ նշում անունը, բայց պաշտոնապես հայտարարում եմ, որ ԱԺ պատգամավորներից մեկն ինձ ասաց. «Մենք ԵԽԽՎ-ին հարցրինք՝ ինչու՞ եք գաղտնի անում, ինչու՞ հրապարակային չի լինում այս ամենը»՝ ԵԽԽՎ պատվիրակներն էլ ասել են, որ Հայաստանի իշխանություններն են ուզել, որ գաղտնի լինի»,-ասաց Սամսոնյանը։

Ակցիայի մասնակիցները Եվրախորհրդի գրասենյակի դիմաց կապույտ ծուխ բաց թողեցին՝ վանկարկելով. «Սորոսի վաստակներին՝ վետո, պետությունը քանդողներին՝ վետո, բանակը քանդողներին՝ վետո…»։