Տարբեր երկրների կողմից Թուրքիային զենքի վաճառքի դադարեցումը ոչինչ չի փոխել, քանի որ Թուրքիան ներկա պահին զենքի կարիք չունի, առավելևս, որ զենքի ազատ շուկա կա, և գումար ունենալու դեպքում ցանկացած երկիր կարող է հանգիստ ձեռք բերել: Այս մասին Tert.am-ի հետ զրույցում ասաց թուրքագետ Հակոբ Չաքրյանը` անդրադառնալով մի շարք երկրների` Թուրքիային զենքի վաճառքի դադարեցմանը:

Չաքրյանի խոսքով` Սիրիայի նախագահ Բաշար Ասադը քրդերին այս հարցով դիմել էր դեռևս այս տարվա օգոստոսին, վերջիններս կտրուկ մերժել էին, որովհետև այն ժամանակ ԱՄՆ-ի հետ էին բանակցություններ վարում:

«Ինքնավարություն էին ուզում, և Բաշար Ասադը ինքնավարությունը մերժեց: Նա նույնիսկ զգուշացրել էր, որ եթե քրդերը չհամաձայնեն, Թուրքիան կներխուժի և կոչնչացնի նրանց, Էրդողանն էլ դա է ասում, թե Սիրիայի դեմոկրատական ուժերը ահաբեկչական ուժեր են, պետք է ոչնչացվեն` Թուրքիայի ազգային անվտանգությունն ապահովելու համար, և ոչնչացնում է»,-մեկնաբանեց թուրքագետը:

Վերջինիս խոսքով` Ռուսաստանը ցանկանում է միջնորդ լինել Թուրքիայի և Սիրիայի միջև, ինչն անհասկանալի է: «Ռուսաստանի` Թուրքիային համոզելը, որ Բաշար Ասադի հետ բանակցությունների մեջ մտնի, Սիրիայի ներկայիս իշխանությանը սպառնալու ձև է: Թուրքիան գնացել է Սիրիայի տարածքն է գրավում, Ռուսաստանը գալիս համոզում է, որ Բաշար Ասադը համաձայնի բանակցությունների սեղանի շուրջ նստել»,-ասաց նա:

Թուրքագետի կարծիքով` Սիրիայում տիրող իրավիճակը, հավանաբար, երկար կտևի: «Սիրիայի կառավարական զորքերը շարժվում են հյուսիս, այնտեղ Ռուսաստանի դիրքորոշումն է կարևոր: Չի բացառվում, որ դավաճանի էլ: ԱՄՆ-ն ուզում է հեռացնել Թուրքիային Ռուսաստանից, Ռուսաստանն էլ չի ուզում ավելորդ ճնշում գործադրել, որ Թուրքիան ԱՄՆ-ի «գիրկը չընկնի»: Իրենք մրցակցում են, Թուրքիան էլ դարձել է այդ մրցակցության «կռվախնձորը»: Թուրքիան, այդ հնարավորությունից օգտվելով, կարողանում է և՛ Ռուսաստանի, և՛ ԱՄՆ-ի միջև խուսանավել: Ամեն դեպքում, շահում է Թուրքիան»,- ամփոփեց Հակոբ Չաքրյանը:

Հոկտեմբերի 9-ին Թուրքիան Սիրիայի հյուսիսում ռազմական գործողություններ է սկսել, որի արդյունքում երկիրն արդեն հարվածներ է հասցրել սիրիական Թել Աբյադ, Ռաս էլ Այն քաղաքներին ու այլ բնակավայրերի: Նպատակը տարածքը «Քրդական աշխատավորական կուսակցության ահաբեկիչներից մաքրելն է», այնտեղ անվտանգության գոտի ստեղծելն ու 3-4 միլիոն սիրիացի փախստականներին բնակեցնելը:

Հոկտեմբերի 14-ին քրդական խմբավորումները համաձայնության են եկել Սիրիայի իշխանությունների հետ Թուրքիայի հետ սահմանին կառավարական զորքեր տեղակայելու շուրջ: Այս մասին ասվում է քրդական ինքնավարության ներկայացուցիչների հայտարարության մեջ, որը հրապարակել է քրդական Firat գործակալությունը: