Չի կարող բնության մեջ լինել որևէ նյութ, որը կապացուցի, որ Հայաստանում 2008 թվականին սահմանադրական կարգը Ռոբերտ Քոչարյանը տապալել է, որովհետև այդ ժամանակ սահմանադրական կարգ չի տապալվել: Այս մասին այսօր՝ ապրիլի 5-ին, Վերաքննիչ քրեական դատարանում լրագրողների հետ ճեպազրույցում հայտարարեց ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը՝ պատասխանելով հարցին, թե քրեական գործի նյութերում ի՞նչ ապացույցներ կան սահմանադրական կարգը տապալելու վերաբերյալ։

Օրբելյանը չցանկացավ խոսել քրեական գործի նյութերում եղած ցուցմունքների մասին՝ նշելով, որ այդ դեպքում կխախտվի նախաքննության գաղտնիությունը և Ռոբերտ Քոչարյանի պաշտպանության գործընթացը: 

«Դետալներին չեմ անդրադառնա, բայց կասեմ հետևյալը՝ այն ծավալով, ինչով մինչ այժմ ուսումնասիրել ենք, կարող եմ ասել, որ որևէ նյութ, հանգամանք,  ցուցմունք, փորձագետի եզրակացություն կամ այլ ապացույց չկա, որն ինչ-որ ձևով կտեղավորվի այն ընկալման մեջ, որը մենք ունենք», — նշեց նա:

Օրբելյանը կրկին շեշտեց, որ Մարտի 1-ի գործը սահմանադրական կարգի տապալման մասով չի կարող քննվել:

«Ամենապարզ փաստարկն այն է, որ 301.1 հոդվածը չի կարող կիրառվել 2008 թ. դեպքերի նկատմամբ, դրանից հետո արդյոք կան ապացույցներ, դրանք շատ են, թե՝ ոչ, կարևոր չէ»,- ասաց նա՝ չբացառելով, որ Մարտի 1-ի գործով կարող են լինել նաև այլ հանցակազմեր:

Անդրադառնալով Վերաքննիչ բողոքների հիմքերին՝ փաստաբանն ասաց, որ Առաջին ատյանի դատարանի որոշումը պատճառաբանված չէ և ավելին, իրենց ներկայացրած մի շարք հանգամանքների ընդհանրապես չի անդրադարձել։

Հիշեցնենք, որ փետրվարի 15-ին ՀՔԾ-ն հայտարարեց 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քննվող քրեական գործով նախաքննության ավարտի մասին։ 50-օրյա ժամկետում կողմերը պետք է ծանոթանան գործի նյութերին: