Քաղաքային իշխանությունն արդեն տևական ժամանակ դադարել է գործել: Տարոն Մարգարյանի հրաժարականից որոշ ժամանակ առաջ և դրանից անմիջապես հետո Երևանը հայտնվեց բարձիթողի վիճակում: Մեր տեղեկություններով՝ վարչական շրջանի ղեկավարները վաղուց դիմումները գրած , սպասում են իրենց հեռանալու ժամին: Հիմա հարց. Նրանք և նրանց ենթակա աշխատակիցները, այս անգործության բոլոր օրերի համար աշխատավարձ ստանում են, թե ոչ:

Երեկ այս հարցը ուղղեցինք ֆեյսբուքում գրանցված «Նիկոլ Փաշինյան» էջերին, ոչ մի արձագանք: Վստահ ենք, որ հարցը նույն հաջողությամբ կարող ենք ուղղել կառավարությանը. Մայրաքաղաքը անտեր է, ստացվում է, որ մինչև ընտրությունները, այս վիճակը շարունակվելու է:

Այն, որ երևանը վերածվել է բացօթյա աղբանոցի, բոլորս ենք տեսնում: Կենտրոնում ով ինչ ուզում անում է, երգում պարում, վաճառում՝ ինչ մտքից անցնում է: Փողոցային առևտուրը հասել է աննախադեպ ծաղկման: Տիգրան Մեծի պողոտայի «Գայանե» հանրախանութի հարևանությամբ գործող խանութները իրենց ապրանքները դուրս են թափել վաճառքի: Դրանցից մեկի(որի ապրանքը գրավել է ողջ մայթը), տնօրենին երեկ ասում եմ ՝«էս ինչ եք անում, խայտառակություն է էսպես ապականել մայթը», ասում է՝ «քաղաքը աղբի մեջ կորած է, թող դա մաքրեն մենք էլ սա կմաքրենք»: Մի պահ ապշեցի, ինչ կապ ունի աղբը, բայց մարդն անդրդվելի էր, ինքը համոզված էր, որ եթե աղբահաններին չեն կարողանում աշխատացնել, իրենց էլ բան ասող չի լինի:

Ասում եմ՝« Լավ կյանք եք ուզում, բայց իրավիճակը պիտի փոխվի մարդու ներսում, եթե դուք չեք գիտակցում ձեր արածը, ուրիշներից սպասելիքներ չունենաք», ձեռք թափ տվեց, թե՝ թողեք աշխատենք: