Ոստիկանության կազմակերպված հանցավորության դեմ պայքարի (6-րդ) գլխավոր վարչության կոռուպցիայի եւ տնտեսական գործունեության դեմ ուղղված հանցագործությունների հակազդման վարչության ծառայողների կողմից ձեռնարկված գործողությունների արդյունքում երեկ՝ հունիսի 8-ին, 6-րդ գլխավոր վարչություն է հրավիրվել Երեւանի բնակիչ, 62-ամյա Ա. Բ.-ն:

Shamshyan.com-ի փոխանցմամբ, վերջինս իրավապահներին հայտնել է, որ ՀՀ առողջապահության նախարարության «Ճառագայթային բժշկության եւ այրվածքների գիտական կենտրոն» ՓԲԸ-ի տնօրեն, 68-ամյա Ն.Դ.-ն օգտագործել է իր պաշտոնեական դիրքը եւ կատարել մի շարք չարաշահումներ:

Կայքի տեղեկություններով, Ա.Բ.-ն 10 տարուց ավելի ձեւակերպված է եղել նշված կենտրոնում որպես ավտոմեխանիկ, ինչի համար նա ամեն ամիս պետք է ստանար 57 հազ. դրամ աշխատավարձ:

Ա.Բ.-ն հայտնել է, որ տարիներ շարունակ ինքը աշխատավարձ չի ստացել, եւ այն կուտակվելով, դարձել է մոտ 7 մլն դրամ, որը նույն կենտրոնի հաշվապահ Լ.Խ.-ի միջոցով փոխանցվել է Ն.Դ-ին:

6-րդ գլխավոր վարչությունում տեղեկություններ են ստացվել նաեւ, որ նման եղանակով Ն.Դ-ի կողմից յուրացվել են կենտրոնում ձեւակերպված 25-ից ավելի քաղաքացիների աշխատավարձերը:

Տեղեկություններ են ստացվել նաեւ, որ Ն.Դ.-ն կենտրոնի շինարարական աշխատանքների եւ բժշկական օգնության ծառայությունների համար հատկացված առանձնապես խոշոր չափերի գումարները եւս կասկածելի եղանակով յուրացրել է:

6-րդ գլխավոր վարչության ծառայողները պարզում են պետությանը պատճառված վնասի չափը:

Փաստի առթիվ նյութեր են նախապտրաստվում:

Գագիկ Շամշյանի տեղեկություններով, Ն.Դ.-ն առողջապահության նախկին նախարար Նորայր Դավիդյանն է: