«Չեմ կարող ասել՝ Սերժ Սարգսյանի վարչապետության դեմ ընդվզում կլինի՞, թե՞ ոչ։ Բայց որ ներկայացնում են, որ ինքն անփոխարինելի է, ինքը չլինի՝ էլ ո՞վ լինի, գնանք մեռնենք էլի։ Չէ՛, մենք ուրիշ երկիր, ուրիշ արդարություն ենք ուզում»,- «Առաջին լրատվական»-ի հետ զրույցում ասաց «Հոգևոր Հայաստան» նախաձեռնության անդամ, «Արձագանք» ստուդիայի հիմնադիր Եղիշե Պետրոսյանը։

Մեր զրուցակիցը նշում է՝ մենք այսքան տառապանք չենք քաշել, որ այսօր էլ ապրենք նման չարքաշ կյանքով։ «Հասարակությունը ընկճված է, կոտրված, ինքն իրեն չի զգում, ոչ մի բանի հետ հույս չի կապում։ Ու սրա մեղավորը մեր իշխանություններն են։ Սա համարել ձեռքբերում՝ անբարոյական քայլ է»,- ասաց Պետրոսյանը։

Եղիշե Պետրոսյանի կարծիքով՝ խնդիրն անձերը չեն, անհրաժեշտ է համակարգի փոփոխություն։ «Ըստ տրամաբանության՝ հասարակությունը պետք է պոռթկա, բայց կլինի, թե ոչ՝ չեմ կարող ասել։ Մեր ժողովուրդն անկանխատեսելի է։ Այնպես չէ, որ վստահ կարող ես ասել, թե նա թքած ունի, թե ով կլինի վարչապետ, և այնպես էլ չէ, որ վստահ ասենք՝ ժողովուրդն անպայման կընդվզի։ Իհարկե, լավ կլիներ, որ ընդվզեր։ Սա անթույլատրելի միջավայր է»,- եզրափակեց նա։

Հարցազրույցն ամբողջությամբ՝ տեսանյութում։