Այսօր՝ մարտի 1-ին, ԱԺ-ում Վահրամ Բաղդասարյանը ներկայացրեց Արմեն Սարգսյանի կենսագրությունը և  կոչ արեց հարմար պահի փակ գաղտնի քվեարկությամբ կազմակերպել ընտրությունը և կողմ քվեարկել: «Ելք» խմբակցության ղեկավար Նիկոլ Փաշինյանը նկատեց, որ  Արմեն Սարգսյանի՝ վերջին տարիներին Հայաստանում մշտապես բնակվելու վերաբերյալ հստակ փաստաթղթեր չկքան ներկայացված:

«ԵԼՔ»-ի բոլոր պատգամավորները առանձին-առանձին հարցադրում արեցին նույն թեմայով, որոնց Արմեն Սարգսյանը այդպես էլ չկարողացավ սպառիչ պատասխանել:

«Մամուլում տպվել են բազմաթիվ հրապարակումներ, որոնք վկայում են, որ Արմեն Սարգսյանը մինչեւ 2014 թվականը եղել է Մեծ Բրիտանիայի քաղաքացի: Արմեն Սարգսյանը բանավոր պարզաբանումներ տվել է, բայց արդյոք մենք ձեռքի տակ ունենք պաշտոնական փաստաթուղթ, թե ե՞րբ է պարոն Սարգսյանը Մեծ Բրիտանիայի քաղաքացիությունից հրաժարվել, երբ է դրա մասին դիմում գրվել ու Բրիտանիայում ուժի մեջ մտել։ Այս պահին մեր ձեռքի տակ չկա փաստաթուղթ, որ Արմեն Սարգսյանը ՀՀ քաղաքացի է եղել և վերջին 6 տարում մշտապես բնակվել է ՀՀ-ում: Բանավոր հայտարարությունների ընթացակարգո՞վ ենք աշխատում: Մեզ տրվել է միայն կենսագրությունը, քաղաքացիության վերաբերյալ փաստաթուղթ քարտուղարությունը չի տրամադրել: Ես խնդրում եմ անհապաղ բերել այդ փաստաթղթերը, որ մենք ծանոթանանք»,-  ասաց Փաշինյանը: Ի պատասխան Վահրամ Բաղդասարյանն ասաց, որ այն, ինչ բանավոր հայտարարել է Արմեն Սարգսյանը՝ հիմնավորվել է փաստաթղթերով, իսկ եթե այն չի բավարարոմ «Ելք» -ին կարող են հարցում անել և պատկան մարմինների կողմից ստանալ այդ հարցերի պատասխանը:

«Եթե չեք հրապարակում, նշանակում է ՝ ինչ -որ բան կա տակը: Դուք պատրաստվում եք նախագահի  պաշտոնը ստանձնել, այսինքն մենք կարող ենք ակնկալել, որ դուք թղթեր եք ստորագրելու՝ չնայլելո՞վ մեջն ինչ է գրված: Կարո՞ղ է գրվի Արմեն Սարգսյան՝ ՀՀ նախագահ, քաղաքացիությունը՝ Մեծ Բրիտանիա: Սա ի՞նչ անլուրջ վերաբերմունքն է ՀՀ քաղաքացու նկատմամբ:  Ձեր ելույթները նման վերաբերմունքով ընդհանրապես արժեզրկվում են »,-ասաց Նիկոլ Փաշինյանը: