Այն, ինչ տեղի ունեցավ երեկ Երևանի ավագանու  նիստին, մեկ բառով կարելի է անվանել՝ խայտառակություն։ Սակայն եղածը մի քանի ասպեկտով դիտարկենք: Այն, որ Երևանն ունի բազմաթիվ չլուծված խնդիրներ, որոնց ֆոնին ոմանց շռայլ ապրելակերպը աչք է ծակում, փաստ է, բայց որ լուծելիք խնդիրների վրա աչք է փակվում պատկան մարմինների կողմից՝ արդեն գեշ խասյաթ է դարձել: Ամեն անգամ մարդկանց դրդում են փողոց փակել, որը հեչ սիրուն չի: Իրենց տարածքի գարշահոտության մասին մեկ անգամ չէ, որ ահազանգել են նուբարաշենցիները, սակայն այս տարածքի, նաև Փարաքարի հատվածի և մի շարք այլ «գարշահոտ» խնդիրներ շարունակում են անտեսված մնալ:

Ինչ է տեղի ունեցել. օրերս «Նուբարաշեն» խճուղու բնակիչները փակել էին Նուբարաշեն քկհ՝ «Կլոր բանտ» տանող ճանապարհն ու բողոքի ակցիա էին իրականացնում: Քաղաքացիներն արդարացիորեն բողոքում էին բանտի բաց կոյողուց, որի գարշահոտությունն են շնչում: Երեկ, Երևանի ավագանու «Երկիր Ծիրանի» խմբակցությունն էլ պարզ ակցիա բեմադրեց։ Ավագանու նիստին,անդամներից մեկը կոյուղաջրով լի տարան փորձեց մոտեցնել քաղաքապետի սեղանին: Տարոն Մարգարյանի ռեակցիան («դեմն առեք» ասաց նա իր մարդկանց) որքան էլ հասկանալի լինի, ընդունելի չէր: Ինչքան էլ «Երկիր Ծիրանին» կոշտ միջոց էր ընտրել բողոքի ձայնը լսելի դարձնելու, ինչքան էլ Զարուհին և իր թիմը անցան սահմանը բողոքի ակցիան իրականացնելու ճանապարհին ,քսի տված տղամարդիկ իրենց ոչ տղամարդկային պահվածքով պարզապես զզվելի էին ու մարդկանց որակումները տղամարդ կոչեցյալների հասցեին լրիվ տեղին է:

Այժմ քննադատելու ,փնովելու հետ մեկտեղ, կարծիքներ է հնչում, որ Զարուհի Փոստաջյանը հասավ իր ուզածին, որ սադրանքը հասավ նպատակին:

Մի պահ մտածենք. ի՞նչ կլիներ, եթե Տարոն Մարգարյանը թույլ տար տարան մոտեցնել իրեն, մի քանի րոպե էլ շնչեր այդ գարշահոտությունը: Ի վերջո Տարոն Մարգարյանը պատերազմող երկրի մայրաքաղաքի քաղաքապետ է, Աստված մի արասցե, վաղը կարող է շատ ավելի բարդ իրավիճակներում հայտնվել, ի՛նչ, ինքը քաղաքը թողնելու է թշնամուն փախչի՞: Հիմա ամբողջ հանրությունն իրարով է անցել, համացանցը բաժանվել է երկու մասի, մի մասը եղածը համարում է սադրանք, մյուս մասը՝ պայքարի ձև: Երկու մասն էլ ինչ- որ կերպ ճիշտ են: Չնայած նրան, որ սա պայքարի ոչ արդյունավետ միջոց էր, ուզում ենք լավատես լինել ու հավատալ, որ ի վերջո կոյուղու հարցը կլուծվի ու մեր համաքաղաքացիները կազատվեն կեղտաջրերի հոտից:

Իսկ եթե այս ակցիան սադրանք էր,նշենք, որ այն նպատակին հասավ ու մեղավորը Տարոն Մարգարյանն ու իր թիմն էր, որ սադրանքն իրենցով արեցին: Ճշմարտություն կարող է լինել այն վարկածը, որ իշխանությունների վերին օղակներում Տարոն Մարգարյանից ազատվելու խնդիր ունեն:Իսկ նա խայծը կուլ տվեց:

Իմիջիայլոց պատմական էքսկուրսը ոչ հեռավոր անցյալ նրա օգտին չէ. նկատենք որ, ՀՀԿ համամասնական ցուցակի 2-րդ համարները նախորդ ընտրությունների ընթացքում համարյա նույն կերպ հրաժեշտ են տվել աթոռին :

2007 թվականին ՀՀԿ թիվ 2-րդը Տիգրան Թորոսյանն էր: Նա հեռացվեց և՛ ԱԺ խոսնակի պաշտոնից, և՛ նաև ՀՀԿ-ից:

2012 թվականին ՀՀԿ համամասնական ցուցակի 2-րդ համարը Հովիկ Աբրահամյանն էր, որը նախ ՀՀ ԱԺ խոսնակն էր, հետագայում ՀՀ Վարչապետը, որը ևս արժանացավ Տիգրան Թորոսյանի բախտին: Հեռացվեց և՛ պաշտոնից, և՛ ՀՀԿ-ից:

2017 թվականի ՀՀԿ համամասնական ցուցակի 2-րդ համարը Տարոն Մարգարյանն էր: Թե ինչ բախտի կարժանանա մայրաքաղաքի ղեկավարն ու Անդրանիկ Մարգարյանի որդին, դեռ պարզ չէ: Բայց պատմությունները կրկնվելու հատկություն ունեն, չի բացառվում, որ Զարուհի Փոստանջյանի այս շոուները ծրագրված են այնտեղից, որտեղի «Սիրուն չի, օպերացիայով» Տարոն Մարգարյանը կհեռացվի: