Հայաստանի իշխող Հանրապետական կուսակցությունում կա տրամադրվածություն՝ Սերժ Սարգսյանին ՀՀ վարչապետի պաշտոնում առաջադրելու մասին: Այս մասին նախ հայտարարել է ՀՀԿ փոխնախագահ Արմեն Աշոտյանը, իսկ այսօր արդեն ՀՀԿ խմբակցության ղեկավար Վահրամ Բաղդասարյանը: Իհարկե, նրանք երկուսն էլ հայտարարում են, որ դեռ հստակ որոշում կուսակցությունում չկա, բայց թե՛ Աշոտյանը, թե՛ Բաղդասարյանը պատահական ոչինչ երբեք չեն ասել: Այս հայտարարությունները նման են սերմերի, որոնք ցանվում են, որ ապրիլին առաջադրվի Սարգսյանի՝ որպես ապագա վարչապետի թեկնածությունը:

Նման քաղաքական հայտարարությունների բերքը կհավաքենք ապրիլին, երբ գործադիր մարմինն իր որոշումը հայտարարի հանրությանը:

Իրականանում է վերլուծաբանների և քաղաքական գործիչների այն վարկածները, ըստ որի՝ Սերժ Սարգսյանն այս Սահմանադրությունը փոխեց հանուն իր ապագայի, հանուն իր հետագա կառավարման:

Ինչ խոսք, Սերժ Սարգսյանը կդառնա Հայաստանի Հանրապետության ապագա վարչապետն ու միանձնյա ղեկավարում կստանձնի: Սա արդեն կասկածից վեր փաստ է:

Ի՞նչ է անելու ընդդիմությունը: Այստեղ ամեն ինչ շատ ավելի ճահճային է, քան թվում է առաջին հայացքից: Գագիկ Ծառուկյանը և համանուն խմբակցությունը լվացել են ձեռքերը և ոչ մի իրադարձության չեն խառնվի: Այս մասին օրեր առաջ հասկացրեց անձամբ Ծառուկյանը՝ հայտարարելով, որ իրենք ոչինչ անել չեն կարող. «ՀՀԿ-ն ունի 50 տոկոս + 1 ձայն, և նրանք են որոշելու թե ով պետք է լինի վարչապետ, այ եթե մենք ունենայինք 50 տոկոս +1 ձայն, մենք կորոշեինք թե ով պետք է լինի ՀՀ վարչապետ»: Ասել կուզի, որ Գագիկ Ծառուկյանը հասկացնում է, որ ինքն ու իր քաղաքական ուժը ՀՀ վարչապետ դառնալու ճանապարհին չեն խանգարի Սերժ Սարգսյանին:

Ծառուկյանը նաև մեղքը բարդում է ընտրողների վրա, ասելով՝ում ընտրել եք, նա էլ կլինի: Գագիկ Ծառուկյանը քաղաքական ասպարեզում հավանաբար կշարունակի մնալ «գոռգոռացող» ընդդիմադիր պերսոնաժ, բայց քաղաքական առումով «Կեցցե նախագահ» ջանը:

Ընդդիմադիր մյուս՝ ԵԼՔ խմբակցությունը, որը հայտարարությունների տեսքով շարունակում է դատապարտել Սերժ Սարգսյանի՝ վարչապետ դառնալու հանգամանքը, հայտարարում է, որ իրենք ամեն ինչ անելու են, որ խանգարեն Սերժ Սարգսյանի՝ վարչապետ դառնալուն: Բայց այ ԵԼՔ-ը չի գիտակցում, որ սպառել է իր ռեսուրսները:Փողոցային պայքարի միտք, հավանաբար ԵԼՔ-ն ունեցել է: Դա է պատճառը, որ թանկացումների դեմ բողոքի ակցիաներ եղան:

Կա քաղաքագիտական վարկած, ըստ որի՝ ԵԼՔ խմբակցությունը փողոցային երթեր էր կազմակերպում, որպեսզի տեսներ թե որքան մարդ կհավաքվի փողոցում, ըստ այդմ նոր հասկանալի կլինի, նրանց ուժը՝ վարչապետական ընտրություններից առաջ:

Քանի որ թանկացումների դեմ բողոքի ակցիաներին հավաքվում էին շատ քիչ թվով մարդիկ, արդեն պարզ է, որ ԵԼՔ-ն էլ չի կարող խանգարել Սերժ Սարգսյանին, գոնե «միտինգային» տրամաբանության մեջ: Իշխող ուժի խնդրանքով և ընդդիմության զրո ռեսուրսները տեսնելով, համադրելով ներկա ողջ իրականությունը, փաստենք, որ Սերժ Սարգսյանը անցնցում կերպով կրկին կդառնա ՀՀ հաջորդ ղեկավարը:

Մկրտիչ Հարությունյան