Հայաստանում սկսվել է քաղաքական թերևս ամենակարևոր շրջաններից մեկը: Տեղի են ունենալու լուրջ վերադասավորումներ: Մեկ ամիս անց ՀՀ ԱԺ-ն ընտրելու է երկրի ապագա նախագահին, իսկ ապրիլին ընտրվելու է վարչապետ: Իշխող ՀՀԿ-ն նախագահի թեկնածու է առաջադրել Արմեն Սարգսյանին, իսկ կոալիցիոն գործընկեր ՀՅԴ-ն, հավատարիմ մնալով «Հին ընկերները չեն դավաճանում» սկզբունքին, արդեն հավանություն է տվել ՀՀԿ-ի թեկնածուին:

Մինչ օրս իրեն ընդդիմադիր հռչակած «Ծառուկյան» խմբակցությունը լռում է: Ծառուկյանի ամբողջ թիմը մեկ մարդու նման ծպտուն չի հանում, այդ կերպ անորոշության մեջ թողնելով այն ընտրողներին, որոնք իրենց քվեն տվել են հենց «Ծառուկյան» դաշինքին: Գագիկ Ծառուկյանն ու իր թիմը հավանաբար չեն գիտակցում, որ այս օրերի իրենց լռությունն անարգանք է իրենց վստահած քաղաքացիների հանդեպ: Նոր փուլում ընդդիմադիր, թե այլ հարթություն կընտրի Ծառուկյանը, դեռ որոշակի չէ, բայց արդեն իսկ պարզ է, որ նա սպասում է «Նախագահ ջան»-ի հրահանգին:

Ինչպես կասի Սերժ Սարգսյանը, այդպես էլ «կորոշի» Գագիկ Ծառուկյանը, նրա թիմակիցներն էլ կոկորդ կպատռեն, որ այդ ամենը իրենք են որոշել՝ թիմով:

Դեռ 2017 թվականի վերջին, մյուս ընդդիմադիր ուժի՝ «ԵԼՔ»-ի առաջարկը մերժվեց Ծառուկյանի կողմից:

Հիշեցնեմ, որ «ԵԼՔ»-ն առաջարկում էր Ծառուկյան խմբակցությանը համատեղ առաջադրել նախագահի թեկնածու: ԵԼՔ-ի թեկնածուն իրավապաշտպան, ՀՀ ԱԺ պատգամավոր Արտակ Զեյնալյանն էր: Քանի որ մերժվեց «ԵԼՔ»-ի առաջարկը, հավանական տարբերակ է, որ Ծառուկյանը հայտարարի, թե իրենք ձեռնպահ են Նախագահի ընտրության հարցում, այդ կերպ մի քանի ընդդիմադիր «ծառուկյանական», Արմեն Սարգսյանին կողմ կքվեարկեն՝ ՀՀԿ-ին հնարավորություն տալով փաստելու, որ Արմեն Սարգսյանին ընտրել է նաև ընդդիմությունը: Կստեղծվի համերաշխության ֆոն:

Ինչ խոսք, Նախագահի ընտրությունն այդքան էլ մեծ նշանակություն չունի, և այն հետաքրքրությունը չի առաջացնում, ինչ վարչապետական ընտրությունները:

Վարչապետի ընտրության ժամանակ, քաղաքացիները, մամուլը, հասարակական լայն զանգվածները Գագիկ Ծառուկյանից հստակ պատասխանի կսպասեն:

Եթե Գագիկ Ծառուկյանն աջակցի ՀՀԿ-ի թեկնածուին (ամենայն հավանականությամբ հենց Սերժ Սարգսյանին), հօդս կցնդի Ծառուկյանի ընդդիմադիր փուչիկը:

Հավանական տարբերակ է, որ հենց ապրիլին ու հենց հանուն Սերժ Սարգսյանի կձևավորվի «Համազգային վստահության կառավարություն», որին մաս կկազմեն ինչպես ՀՀԿ-ն ու ՀՅԴ-ն, այնպես էլ ընդդիմադիր Գագիկ Ծառուկյանի ղեկավարած «Ծառուկյան» դաշինքը:

Այդ պարագայում ԵԼՔ-ը կմնա իր երազած «միակ ընդդիմություն» կարգավիճակում: Իսկ թե ինչ կարգի ընդիմություն է Ելք-ը ՝բոլորին է պարզ:

Ինչևէ, մինչև նախագահական և վարչապետական ընտրություններ դեռ ժամանակ կա և մեծ ցնցումներ, գոնե այս ընթացքում, չի նշմարվում: Ամեն ինչ պարզ կդառնա առաջիկա շաբաթներին:

Մկրտիչ Հարությունյան