armtimes.com —ի տեղեկություններով, Արցախում զենքի կանոնների խախտման հետեւանքով մահացած զինծառայող Հովսեփ Կարենի Գրիգորյանը մահացել է հունվարի 27-ին:

Արցախի ՊԲ-ն այսօր տարածած իր հաղորդագրության մեջ չէր նշել, թե դեպքը երբ է տեղի ունեցել: Քանի որ երեկ հունվարի 28-ն էր՝ Հայոց բանակի 26-րդ տարեդարձը, ենթադրվում է, որ հենց այդ պատճառով էլ դեպքի մասին Արցախի ՊԲ-ն հայտնեց միայն այսօր:

Մեզ հաջողվեց ճշտել, որ զինծառայողի ուղղությամբ կրակել է զինծառայակիցը: Նա զենքը լիցքավորելիս խախտել է զենքի օգտագործման կանոնները, ինչի հետեւանքով էլ արձակված կրակոցից Հովսեփ Գրիգորյանը մահացել է: Մեր տեղեկություններով, Գրիգորյանի ուղղությամբ կրակոցներ արձակած ծառայակիցը ձերբակալվել է:

Այսօր Արցախի ՊԲ-ն տեղեկացրել էր, որ ՊԲ հյուսիսային ուղղությամբ տեղակայված զորամասերից մեկի պահպանության տեղամասում, նախնական տվյալներով՝ զենքի օգտագործման կանոնների խախտման հետեւանքով, մահացու հրազենային վիրավորում է ստացել ՊԲ զինծառայող, 1998թ. ծնված Հովսեփ Կարենի Գրիգորյանը:

armtimes.com-ը գրում է, որ Արցախում հունվարի 27-ին մահացած 19-ամյա զինծառայող Հովսեփ Գրիգորյանը Սպիտակ քաղաքի բնակիչ էր: Նա բանակ էր զորակոչվել 2017 թվականի հուլիսին:

«Հայկական ժամանակ»-ի հետ զրույցում Սպիտակի զինկոմ Աղասի Խաչատրյանը նշեց, որ Հովսեփ Գրիգորյանը ծնվել է Վրաստանում, ապրել ՌԴ-ում՝ մոր եւ քրոջ հետ: Մեր հարցին ի պատասխան զինկոմն ասաց, որ զինծառայողի հայրն անհայտ բացակայող է, նրա մասին տեղեկություններ հայտնի չեն, իսկ մայրն աշխատում է ՌԴ-ում: Հովսեփ Գրիգորյանը ՌԴ-ից Հայաստան էր եկել հայրենիքի նկատմամբ իր պարտքը կատարելու համար: «Ապրում էին տատիկի եւ պապիկի տանը՝ սոցիալապես անապահով պայմաններում»,- ասաց Սպիտակի զինկոմը: